КӘШФИЕВА ЛӘЙСӘН

Кәшфиева Ләйсән Әмир кызы 1966 елның 8 августында Башкортстанның Тәтешле районы Югары Кодаш авылында укытучылар гаиләсендә туа. Мәктәп елларында ук шигырьләр яза башлый. Шигырьләре "Ялкын", "Пионер" журналларында, "Яшь ленинчы", "Башкорт-стан пионеры" газеталарында даими басыла килә. 1983 елда туган авылында урта мәктәпне тәмамлагач, Ләйсән Уфа шәһәрендәге Башкорт дәүләт университетының филология факультетына укырга керә. Бер үк вакытта әдәби иҗат белән дә шөгыльләнә, университетның "Акчарлаклар" әдәби иҗат түгәрәгендә актив эшли. "Кызыл таң" газетасында әледән-әле язмаларын һәм шигырьләрен бастырып тора, студентларның гыйльми конференцияләренә йөри, галимнәр белән аралаша. Университетны тәмамлагач, 1988 елда Казан университеты каршындагы аспирантурага укырга керә һәм Тәлгат Галиушшн җитәкчелегендә "Сугыштан соңгы татар сатирик поэзиясе" (50-80 еллар) дигән темага кандидатлык диссертациясен язып, аны 1991 елда яклый. Ләйсәннең Казанда калып яшәргә теләге зур булса да, язмыш җилләре аны нефть төбәгенә алып китә һәм ул "Татнефгь" ААҖнең "Хәзинә" газетасында эшли башлый. Биредә ул шигъри каләмен чарлый, профессиональ журналист булып җитешә, телевидение өчен дә тапшырулар, фильмнар әзерли. Нефть төбәгендә чыга торган газеталарда башка язмалары белән бергә әдәби-тәнкыйть мәкаләләре һәм шигырьләре даими чыгып тора. Аның кайбер шигырьләре 2002 елда нефть төбәге шагыйрьләре иҗатын эченә алган "Син дә шагыйрь, мин дә шагыйрь" китабында да дөнья күрде. Быел "Рухият" нәшриятында "Авыл кызы" исемле шигырьләр җыентыгы чыкты.

Ләйсән Кәшфиева әдәби тәнкыйть белән дә җитди шөгыльләнә. Нефть төбәге язучылары иҗатына багышланган гыйльми докладлары белән ул республикакүләм гыйльми конференцияләрдә катнаша, фәнни язмаларын гыйльми җыентыкларда, журналларда бастыра. Әле күптән түгел генә "Мәйдан" журналында (1/2003) Миргазиян Юныс иҗатына багышланган хезмәте дөнья күрде.

30 июньдә Кабул итү Коллегиясе карары нигезендә (рекомендация бирүчеләр-Т. Галиуллин, К. Булатова, X. Миннегулов) Язучылар берлеге Идарәсе Кәшфиева Ләйсән Әмир кызын Татарстан Язучылар оешмасына әгъза итеп кабул итте.

Казан утлары № 9, 2003.