ХӘЛИУЛЛИНА РОЗА

Роза Заһит кызы Хәлиуллина 1931 елның 14 июнендә Татарстан АССР Актаныш районы Әҗәкүл авылында туган. Гомуми белем мәктәбендә җиде класс тәмамлаганнан соң, Такталачык больницасы каршында ачылган алты айлык курсларда укый һәм 1948 елга кадәр шул больницада күз авырулары буенча медсестра булып эшли. 1948 елда Казанга килеп, җиңел промышленность профессиональ техник училищесына укырга керә, аны тәмамлагач, дүрт ел Казан аяк киемнәре комбинатында оператор хезмәтендә була, бер үк вакытта эшче яшьләрнең кичке урта мәктәбендә укый. 1952—1956 елларда Роза Хәлиуллина — медицина училищесы студенткасы. Училищены дәвалаучы-акушер дипломы белән тәмамлап чыккач, ул озак еллар Казанның төрле медицина учреждениеләрендә һәм промышленность предприятиеләрендә эшли, 1966—1969 елларда, төп хезмәтеннән аерылмыйча, Казан медицина институтында укый. 1978 елдан Р. Хәлиуллина — профессиональ язучы хезмәтендә.

Р. Хәлиуллина иҗат эше белән 1960 елда шөгыльләнә башлый. Шул вакыттан алып аның шигырьләре республика балалар газетасы «Яшь ленин-чы»да, «Татарстан яшьләре», «Социалистик Татарстан» газеталарында, «Ялкын», «Азат хатын», «Казан утлары» журналларында еш басыла. Соңга таба шагыйрәнең аерым әсәрләре күмәк җыентыкларга кертелә («Беренче карлы-гачлар», 1969; «Беренче адымнар», 1971; «Кызлар җыры», 1977), кечкенәләр өчен «Бөрлегәнгә медаль» (1973), «Чүкеч нәни булышчы, (1977) кебек мөстәкыйль китаплар булып та чыга. Болар — шагыйрәнең эзләнү, үсү юлындагы беренче тәҗрибәләре.

Җитмешенче елларның икенче яртысыннан башлап Р. Хәлиуллина иҗат эше белән аеруча җитди шөгыльләнә. Бу елларда ул «Каенана» исемле поэмасын («Казан утлары», 1977, № 10) һәм күп санлы лирик шигырьләрен яза. Алар соңыннан, 1980 елда, «Агыйдел — аккош иле» исемле җыентыкка тупланып, укучылар хөкеменә тәкъдим ителәләр.
Р. Хәлиуллина —1981 елдан СССР Язучылар союзы члены.

©"Совет Татарстаны язучылары" китабыннан файдаланылды (Даутов Р.Н., Нуруллина Н.Б. Совет Татарстаны язучылары. – Казан, Татарстан китап нәшрияты, 1986)