Казанда узучы XV Бөтенроссия «Һөнәр» яшь режиссура фестивалендә 15 театр катнаша

XV Бөтенроссия «Һөнәр» яшь режиссура фестивале Кариев театры сәхнәсендә Ренат Әюповның «Ал җилкәннәр» спектакле белән ачылды.

Кариев театрының баш режиссеры Ренат Әюпов спектакльне яшь команда – яшь композитор, рәссам һәм сценограф белән эшләде. Быел Укытучылар һәм остазлар елы. Шуңа күрә дә остазлык темасы – фестивальнең үзәгендә.

Фестиваль кысаларында танылган театр тәнкыйтьчеләре Жанна Зарецкая, Марина Шимадина, Юлия Клейман һәм Нияз Игъламов Татар китабы йортында лекторийлар үткәрә.

«Тематика бик кызыклы: монда яшьләр театры темасы да, хатын-кыз режиссерлар, Россия күләмендә эшләүче алдынгы режиссерлар һәм аларның нинди әсәрләр белән эшләве дә. Шулай ук бүгенге яшүсмерләр сәхнәсе темасы турында да фикерләшү булачак», – дип сөйләде Кариев театры директоры, XV Бөтенроссия «Һөнәр» яшь режиссура фестиваленең башкарма директоры Луиза Шарова.

XV Бөтенроссия «Һөнәр» яшь режиссура фестивале 1-7 нче декабрь көннәрендә 7 театр мәйданчыгында уза. 15 нче юбилей фестивалендә 15 театр катнаша, төрле яшь категорияләре өчен 16 спектакль күрсәтелә. Быелгы «Һөнәр»гә Татарстан Республикасы театрлары белән беррәттән, Ачинск (Красноярск крае), Барнаул (Алтай крае), Сарапул (Удмуртия Республикасы), Губаха (Пермь крае), Туймазы (Башкортстан Республикасы), Чабаксар (Чувашия Республикасы) театр коллективлары да килгән, дип язв "Татар-Информ" МА.