Идел буе халыклары костюмнары күргәзмәсен сентябрь ахырына кадәр күрергә мөмкин

Казан Кремлендә «Казан Идел буе: халык мәдәнияте образлары» традицион киемнәренең уникаль күргәзмәсе ачылды, анда XIX гасырның икенче яртысы – XX гасыр башы шәһәр һәм авыл халкының (рус, татар, чуаш, удмурт, мари, мордва һәм башкорт) традицион киемнәренең 29 костюм комплексы тәкъдим ителгән.

Костюм комплексларының күп кенә элементлары (кием, бизәнү әйберләре, аксессуарлар) сакланып калган музей экспонатлары һәм шәхси коллекцияләргә нигезләнеп, кул белән башкарылган. 

Күргәзмәне ачуда дәүләт хакимияте органнары, Татарстанның һәм Идел буе федераль округының киң этномәдәни, фәнни һәм музей җәмәгатьчелеге вәкилләре катнашты.

Евгений Ефимов, Татарстан Республикасы Рәисе Департаментының эчке сәясәт мәсьәләләре буенча милли сәясәтне гамәлгә ашыру идарәсе башлыгы урынбасары: «Бу безнең республиканың бөтен этномәдәни берләшмәсе өчен зур һәм бик мөһим вакыйга. Әйдәп баручы белгечләрне, үз эшегезнең профессионалларын һәм халык мәдәниятенә битараф булмаган барлык тикшеренүчеләрне берләштереп, сез күп санлы иҗади этномәдәни коллективлар, халык иҗаты һәм өстәмә белем бирү учреждениеләре өчен төп методик базага әвереләчәк традицион киемнәрнең уникаль коллекциясен булдырдыгыз. Рөстәм Нургали улы Миңнеханов күргәзмәне караган вакытта кыска вакыт эчендә чын шедеврлар булдыра алган барлык осталарга югары бәя бирде. Бу проектның республикабызда традицион мәдәниятне саклау һәм популярлаштыру буенча алга таба күп дәрәҗәле эш өчен зур перспективалары бар дип ышанам».

Проект Татарстан халыклары Ассамблеясе һәм Халыклар дуслыгы йорты инициативасы һәм Татарстан Республикасы Рәисе Р.Н. Миңнеханов ярдәме белән уңышлы тормышка ашырылды. Проектта Татарстан Республикасының 45 республика, муниципаль, авыл һәм мәктәп туган якны өйрәнү музее; Татарстан һәм Идел буеның әйдәп баручы галимнәре, тикшеренүчеләре һәм җәмәгать эшлеклеләре катнашты. Проект кысаларында экспертлар төркеме Татарстан халыкларының тупланып яшәгән урыннарындагы матди мәдәни мирасын өйрәнде. Проектның фәнни җитәкчесе — тарих фәннәре кандидаты, Татарстан Республикасының атказанган мәдәният хезмәткәре Елена Гущина.

Проектның мөһим нәтиҗәсе — «XIX гасырның икенче яртысы – XX гасырның беренче яртысы Казан Идел буе халыкларының традицион костюмы» дигән иллюстрацияле каталог чыгу. Әлеге басма — презентация характерында, ул Татарстанның төбәк, район һәм авыл музейларының уникаль этномәдәни мирасын Россия һәм чит илләрнең киң социомәдәни киңлегенә таныта. Каталогның күп кенә экспонатлары беренче тапкыр бастырылган һәм киң җәмәгатьчелек өчен Идел буе халыкларының мәдәни мирасын өйрәнү өчен кыйммәтле чыганак булып тора.

Күргәзмә үз эшен 2023 елның 30 сентябренә кадәр дәвам итәчәк. Керү ирекле, алдан язылу кирәк, дип хәбәр итә Дуслык йортының мәгълүмат үзәге.