Илгәрәй: “Күз тамырларыма кадәр сулкылдап сызлый...”

Соңгы араларда болай да саулыгы әллә ни мактанырлык түгел иде, клип төшергәндә Илгәрәйнең кулын сындыруын хәтерлисезме? Клиптагы эпизодта ул гитараны стенага китереп суга. Ышандырырлык итеп уйнарга теләүдәнме, көчен йөгәнли алмый каламы, катырак селтәнә. Нәтиҗәдә, гитара белән бергә чәнти бармагына килүче сөяк тә чәрдәкләнә. Бик сызласа да түзә, клипны төшереп бетерәләр ул чакны. Ә бу юлы чирләп китүенә чит хатын сәбәпче.

 

– "Бигрәк матур ир сез! Шул кадәр матур күзләрегез, карашларыгыз... Хатыныгыз бәхетеннән ишелеп уңган” – дип бер кыз күзен күземнән дә алмаган иде. Фотограф ул. Җитмәсә рус кызы. Аларның күзләре бигрәк каты икән, – ди Илгәрәй.

 

Эш болай була. Җырчы, алдан килешеп, фотосессиягә бара. 4 сәгать буе кояш астында фотога төшәләр. Менә шунда фотограф кыз җырчыны мең төрле комплиментка күмә. Әллә кызның җырчыга күзе төшә, әллә фотолары чыксынга юри үсендерә. Уеннан уймак килеп чыга – җырчы өенә хәлдән таеп кайтып егыла.

 

– Ишектән ничек атлап кергәнемне дә хәтерләмим. Күз алды тоташ томан, җеп өзәрлек тә хәл калмаган. Ашау-эчү юк. Төнне чак чыктым – үләм дип торам. Иртән башны күтәрер хәл, кулларым, аякларым, умыртка сөяге, хәтта күз тамырларыма кадәр сулкылдап сызлый. Көн буена кан басымын чак күтәрдек, күпме дару эчеп тә 40 /60тан селкенмәде. Кичен банкет җитмәсә, сөйләшенгәч миңа ышанып торалар, кешене дә ярык тагарак янында калдырып булмый. Үзем дә сүзендә тормаган кешене яратмыйм. Киттем чак сулап. Барып кердем дә: “Зинһар, егетләр, 5 җырымны рәттән җырлыйм да кайтып китим, утырырлык хәлем юк”, – дигәч тыңладылар. Әле ярый җырларга гына чакырдылар, туйны алып барасы булса нишләр идем? Көннәр дә эссе, кәеф күтәрелмәсме, тирләгәч рәтләнеп китмәмме дип, өйгә кайткач мунча кереп чыктым әле. Ә миңа бөтенләй мунча керергә ярамаган. Икенче көнне иртән тән температурасын үлчәп карыйбыз, бер 38-39 градуска менә дә кире 36га төшеп утыра, – ди Илгәрәй.

 

Тагын бер көн ятакта аунагач кына, җырчы “Булай булмас”, – дип хастаханәгә китә. Табиблар тикшергәч, шундый сүз җиткерә: “Ашамыйча, эчмичә йөргәнсез, организмыгыз алҗыган, арыгансыз, ял кирәк! – диләр.

 

– 2010 елны ук үт куыгымны алдырган идем. Менә шуның нәтиҗәсе. Организмдагы һәр орган үз эшчәнлегенә бик кирәк. Үт куыгы булмагач, организм ризыкны тиешенчә эшкәртеп тә, үзләштереп тә бетерә алмый икән, шул сәбәпле минем организмга тимер җитми, дип аңлатты табиблар. Хәлсезләнеп йөрүемнең сәбәбе ачыкланды. Дарулар язып бирделәр, көн бер уч тутырып дару эчәм, ышанасызмы? Хәлем яхшыра төште, – ди Илгәрәй.

 

Инде үз саулыгын ныгытып кайгыртырга, узганчы сырхауларыннан тернәкләнергә исәп тота ул.

 

Фото: https://vk.com/ilgarayclub