Гөлназ Асаева: "Без табиблар бирә алмый торган ярдәмне күрсәтергә тиеш"

Тамашаны Гөлназ башлап җибәрде. Рәттән берничә җыр башкарганнан соң, халыкта төрле фикерләр тудырган хәлгә карата җырчы үз сүзен әйтте. Хәтерлисездер, кайберәүләр артистларга: “Бик авыр вакытлар кичерәбез. Ә сез җырлап йөрисез”, - дип шелтә белдергән иде.

 

- Без бернинди табиблар да бирә алмый торган ярдәмне күрсәтергә тиешбез. Концерттан соң, 3-4 көнгә генә булса да, кәефләрегез күтәрелсә, бездән дә бәхетле кеше булмаячак, - диде ул. 

 

Ярый әле җырлыйбыз. Җырлар белән күңелдә булган бөтен кайгы-хәсрәт, шатлык-куаныч та чыга бит. Һич төшенкелеккә бирелергә ярамый. 

 

Гөлназ үзенең җырларына өстәп, татар халык җырларын башкарды. “Мәк чәчәге”н тамашачылар аңа кушылып җырлап утырды. Баянга “Мәтрүшкәләр” җырын яңгырады. Рәзил Камалов баянын сузып җибәрде, Гөлназ аңа кушылды. Шәп килеп чыкты. Айдар Галимов репертуарыннан “Абага чәчәге” дә ишетелде. Гөлназ аны үз стилендә башкарды. Әзрәк яңа сулыш өстәп җибәрде. Ничек кенә карасак та, Гөлназ белән Вилданның аудиториясендә аерма бар. Гөлназ өлкәнрәк яшьтәгеләрнең күңеленә хуш килсә, Вилли - яңа буынны шатландыра.

 

Вилдан Шәмсетдиновның да үз “биюе” бар икән. Кулларын әллә нәрсә эшләтеп куя тагын. Хәзер күп кенә җырчылар бер үк хәрәкәтне кабатлый бит. Ул аларны башкалардан аерып тора.  Үзенә күрә бер “мода”, “изюминка”. Хәер, Вилли кадәр булдыра алмабыз шул.

 

 Вилдан сәхнәгә чыккач ук, илһам чишмәсен яшермичә атады:

 

- Концертыбыз ике өлештән торачак. Гөлназ җырлары аша үзенең әйтер сүзләрен җиткерер. Минем инде шул бер тема - Гөлназ, - диде ул. 

 

Вилли җырлый башлагач, башта нишләптер Элвин Грей образы туа. Охшаш яклары күп. Хәтта сөйләшкәндә тавышлары да бер-берсенә тартым. Киенү стиле, чәч рәвеше дә охшаган. Бер лейблдан чыкканнары күренеп тора. Ә шулай да Вилданның сөйкемле сөяге бар. Бер җыр дәвамында бите нинди генә хис-кичерешләр күрсәтми. Кашлары баслар астына сикереп куя, авызы колакта. Ул тамашачыга заманча җырлар тәкъдим итте. Көйләренә сүз юк, сүзләренә генә. Куплетларда булган мәгънә кушымтага да күчсен иде. 3-4 сүзне кабатлаудан гыйбарәт кушымталарны кабул итеп булмый, гафу итәрсез. 

 

Гөлназ белән Вилдан дуэт җырлаганда, сәхнәгә кызлары Динә йөгереп чыкты. Әти-әнисе кочагына сыенып, төрле төстәге утларны күзәтте сабый. Тамашачылар биргән татлы бүләкне кулына тотты. Икенчесен сузганнар иде, беренчесен алмашка сузды. Менә, ичмасам, тәрбия бу! Матур гаилә, тормыштагы мөнәсәбәтләре тотрыклы була күрсен. Башка низаглар чыкмас дип ышанып калабыз. 

 

Концертка Вилдан һәм Гөлназның әти-әниләре дә килгән. Гөлназның ике әтисе дә бер үк вакытта сәхнәгә чыгып, кызын котлады: “Гомер тиз үтә, һәр минутның тәмен белеп яшәгез”, - дип хәер-фатиха бирделәр. Ике әти дә бергә кочаклашып, сәхнәдән төшеп китте.

 

Ике сәгатькә сузылган тамаша ялыктырмады. Заллары тулы булды. Бәлки, киләчәктә Гөлназ белән Вилданның аерым концертларын да күрербез. Ә әлегә тәмам.