"Мөмкинлекләрем чик­ләнмәгән, барысын да булдырам"

Конкурс алты номинациядә уза. Сынлы сәнгать, декоратив-гамәли сәнгать, хореография, музыкаль иҗат, театраль иҗат һәм сәнгатьле уку, инклюзив педагогика. Исеменнән үк күренгәнчә, монысы педагоглар өчен.

 

Әлегә Хакасия, Татарстан, Чувашия, Марий Эл республикаларыннан, Волгоград , Кемерово, Архангельск, Мурманск өлкәләреннән, Ставрополь һәм Пермьнан, Нижневартовск , Чебоксар, Ульяновск, Астрахань шәһәрләреннән барлыгы 41 төбәктән 700 катнашучыдан 300ләп гариза килгән. Коллективлар да бар. Конкурста мөкинлекләре чикләнгән 11-20 яшьлек балалар һәм инвалид балалар белән эшләүче педагоглар катнаша ала.

 

Бәйге өч этапта уза. Беренчесе читтән торып. Катнашучылар гариза һәм үз эшләрен тәкъдим итәләр. 2нче этап Казанда мәдәният институтында. Ә өченчесе 30 апрель көнне барлык номнацияләр буенча да җиңүчеләрне бүләкли торган гала-концерт була.

Башкалабызда мондый конкурс инде өченче тапкыр 2020елдан башлап уздырылганын белгәч, анда катнашучы балалар һәм аларның әти-әниләре өчен сөенеп куйдык. Язмыш тарафыннан шактый кыерсытылган бу балаларга үзләрен күрсәтергә, талантлары белән сокландырырга җай тудырылган бит.

 

Хәер, башкача була да алмыйдыр. Бу заман таләбе. Ни кызганыч, мөмкинлекләре чикләнгән балалар саны төрле сәбәпләр аркасында елдан-ел арта һәм бүген илебездә 18 яшькә кадәр 730 мең 472 бала шундый хәлдә. Һәм аларның мөмкинлекләре чынлап та чикләнгән. Андый балаларның бары тик 9%ы гына хыялларын тормышка ашыра, югары белем ала. Әлеге конкурсның төп максаты да мөмкинлекләре чикләнгән балаларның иҗатын үстерү өчен уңай шартлар тудыру, аларда үз көчләренә ышанычны арттыру, тормышта үз урыннарын табарга ярдәм итү. Бу хакта журналистларга әлеге конкурсны оештыру идеясе инициаторы булган Казан дәүләт мәдәният институты ректоры, фәннәр докторы, профессор Роза Әхмәдиева, Абилимпикс проекты координаторы Анна Сидоренко, Казан шәһәренең мөмкинлекләре чикләнгәннәр белән эшләү республика вузара үзәге директоры Елина Мелина тәфсилләп сөйләде. Быелгы конкурста 700ләп бала катнашачак. Димәк, җиңүчеләр саны да күп булачак.

 

Ә бит шактый еллар без бу зур проблемага күз йомып килдек. Ул бары тик мондый баласы булган әти-әни, әби-бабайларның гына җан ярасы булды. Шөкер,соңгы елларда андыйларга игътибар артты. "Мөмкинлекле мохит" программасы нигезендә алар хәзер тулы канлы тормыш белән яши башлады. Әле үзләре генә шатланып калмыйча, башкаларны да иҗатлары, осталыклары белән куандыралар. Республикабыз башкаласында үткәрелә торган Бөтенроссия конкурсы да моның матур үрнәге. Ә инде аның нәкъ бездә, татар илендә уздырылуы халкыбызның игелеге, шәфкате турында бөтен илгә сөйли.

Фото: пиксабай