СЕР ЙОМГАГЫН СҮТЕП КАРЫЙБЫЗМЫ?

Похвистнево районындагы атаклы Гали авылының 400 еллык юбилее алдыннан

Авылыбызга тиздән 400 ел тулачагын хәбәр иткәннән бирле аның тарихы белән кызыксынучылар күбәеп китте әле. Менә декабрь башларында гына Әлмәт шәһәрендә яшәп иҗат итүче күренекле шәхес, язучы Роза ханым Абзалова-Сәлманова, Габдрахман авылының хакимият башлыгы Өлфәт Усманов һәм тарих укытучысы Мәстүрә ханым безгә кунакка килеп төштеләр. Язучылар, тарихчылар белән аралашу үзе бер гомер бит.

Белмәгәннәре, ишетмәгәннәре юк кебек аларның. Нинди сорауга да төгәл җавап, төпле фикерләре әзер. Мәсәлән, Роза ханым безне җиде буын ата-бабаларыбызның искитәрлек бай тарихы белән таныштырды, Гали авылына 400 ел гына түгел, күбрәк тә булырга тиеш икәнлеген дәлилләп сөйләде. Шунда безгә авылыбызның кысып төйнәп куелган сер йомгагы әкрен генә сүтелә башлады кебек тоелып китте.

Татар кешесе, бигрәк тә иҗади җанлысы, кайда гына яшәсә дә, үз ягын мактый, өйрәнә, уңышларына сөенә. Роза ханым да үзенең «Иманлы төбәк җәүһәрләре» исемле китабын бастырып чыгарган. Анда безнең якның мәртәбәле кешеләре, танылган шәхесләре турында бик кызыклы материаллар тупланган.

Язучы үзенең шушы яңа китабы белән безне дә кыскача гына таныштырып үтте, берничә данәсен авыл китапханәсенә дә бүләк итеп калдырды. Баштан ук, кунаклар килеп төшкәч тә, Гали авылының хакимият башлыгы Идрис Муллабаев аларны авылыбыз белән таныштырып чыккан, изге урыннарыбызны күрсәткән, эшмәкәрләребезнең уңышлары белән таныштырып үткән икән. Быел бит бездә авылыбызның 400 еллыгына багышланган Федераль авыллар Сабантуе уздырылачак, һәм анда Татарстан Республикасы Президенты Минтимер Шәймиев тә катнашыр дип көтәбез. Шушы уңайдан авыл хакимияте башлыклары да, эшмәкәрләребез дә авылыбызны бәйрәмчә матурлау, төзекләндерү белән мәшгуль. Бу эшләрне күреп, кунаклар да сөенгәннәр.

Кичен кунаклар хөрмәтенә үткәрелгән кичәдә алар барысы да бертавыштан диярлек: «Авылыгыз бик матур икән, безгә бик ошады. Тормыш-көнкүрешегез, уңганлыгыгыз, кунакчыл булуыгыз, ата-бабаларыбыздан калган йолаларны, гореф-гадәтләрне саклавыгыз, ислам диненә таянып яшәвегез, үзгәртеп кору, финанс кризис шартларында да югалып калмыйча, үзегезнең юлыгызны табып, алдынгы хуҗалык булып танылуыгыз белән бик сокландык», – дип, үзләренең фикерләре белән уртаклаштылар. Бу кичәгә тирә-як авыллардан килүчеләр дә бар иде. Шулай, Мансур авылы Мәдәният йорты директоры Рәшидә Фәйрушина һәм Ләйсән Миңлеголова бик матур җыр алып килгәннәр. Мәчәләй артистлары Алия Әхмәтова һәм Шакир Абдрахманов парлы шаян бию һәм җыр башкардылар. Безнең авыл яшьләре Юлия Карипова, Ислам Кәлимуллин, Гүзәл Латыйпова, Рузия Йосыпова башкарган җырларны кунаклар да, авыл халкы да шулай ук көчле алкышларга күмделәр. Кичәне оештыручылар укытучы, депутат Кәүсәр Шәйхетдиновага, Гали авылы Мәдәният йорты директоры Асия Әхмәдиевага барысы да үзләренең рәхмәтләрен белдерделәр. Алар гел авылыбыз халкын сөендереп, яңадан-яңа концертлар әзерләп кенә торалар. Кичәдән соң кунаклар белән бергәләп бәлешләр ашап, тәмле чәйләр эчеп, көлешә-көлешә мәзәкләр сөйләп, туганнар кебек хушлаштык. "Сабан туена килербез, исән булсак. Хәзер юлны беләбез инде", – дип, кунаклар кайтыр юлга чыктылар.

Дулкынлы тау итәгендә

Асылташлар сипкәндәй.

Авылым балкып утыра

һәркөн кунак көткәндәй.