|
|
Бүген кемнәр туган
|
|
Архив
|
13.05.2008 Сәясәт
КӘНӘФИЛӘР БҮЛЕНДЕЯңа Премьер-министр Владимир Путин, эшне озакка сузмыйча, яңа Хөкүмәт составын игълан итте. Президент Дмитрий Медведев Путин тәкъдим иткән кандидатураларны тулысынча хуплады һәм 12 май көнне шул хактагы указга кул куйды. Путин белгечләр фаразын аклады: яңа Хөкүмәттә 7 вице-премьер булачак. Шуларның икесе беренче вице-премьер вазифасын башкарачак. Әмма элек беренче вице-премьер вазифаларын башкарган булган Сергей Иванов яңа Хөкүмәттә премьер урынбасары гына булачак. Хәзер аның кәнәфиен элеккеге Премьер-министр Виктор Зубков белән Президент киңәшчесе Игорь Шувалов бүлешәчәк. Шулай ук Хөкүмәт рәисе урынбасары дәрәҗәсенә Президент администрациясе җитәкчесе һәм аның урынбасары Сергей Собянин белән Игорь Сечин да күтәрелде. Александр Жуков белән Алексей Кудрин исә үз урыннарында калдылар. Кудринга вице-премьер вазифалары белән бергә икътисад министры вазифасын да башкарырга туры киләчәк. Күзгә ташланып торучы төп закончалык — элекке җитәкчеләр янына Путин үзенең якын хезмәттәшләрен өстәгән. Беренчеләренә дә зарланырлык түгел, Путинга да үз кешеләре белән эшләү уңайлырак. Бу командада вице-премьер, Хөкүмәт аппараты җитәкчесе Сергей Нарышкинга гына урын калмаган...
Хөкүмәттә үз вазифаларын саклап калган министрлар шактый. Яңа Хөкүмәттә дә Андрей Фурсенко — мәгариф һәм фән, Алексей Гордеев — авыл хуҗалыгы, Татьяна Голикова — сәламәтлек саклау һәм социаль үсеш, Дмитрий Козак — төбәк үсеше, Сергей Лавров — тышкы эшләр, Юрий Трутнев — табигый ресурслар, Игорь Левитин — транспорт, Рәшит Нургалиев — эчке эшләр, Анатолий Сердюков — оборона, Сергей Шойгу — гражданнар оборонасы һәм гадәттән тыш хәлләр министры вазифаларын башкаруны дәвам иттерәчәкләр.
Владимир Путин яңа министрлыклар да оештырды. Алар арасында күптән көтеп алынганы — спорт, туристлык һәм яшьләр сәясәте министрлыгы. Аның җитәкчесе исә бөтенләй көтелмәгән кеше — Россия футбол союзы башлыгы Виталий Мутко.
Икътисади үсеш һәм сәүдә министры Эльвира Нәбиуллинаның эше кимеде — хәзер ул икътисади үсеш министрлыгын гына җитәкли. Сәүдә эшләре исә элеккеге сәнәгать һәм энергетика министры Виктор Христенкога күчте. Яңа министрлык сәнәгать һәм сәүдә министрлыгы дип атала. Энергетикага исә аерым министрлык бүлеп бирделәр. Аны “Атомстройэкспорт”ның элекке президенты Сергей Шматко җитәкли. Яңа Хөкүмәттә Леонид Рейман җитәкләгән мәгълүмати технологияләр һәм элемтә министрлыгы юк. Аның урынына элемтә һәм массакүләм коммуникацияләр министрлыгы оештырылды. Җитәкчесе итеп Рейман түгел, Президент протоколы башлыгы Игорь Щеголев билгеләнде. Элек массакүләм коммуникацияләр белән бер министрлыкка берләштерелгән мәдәният аерым министрлыкка бүленде. Аның җитәкчесе — Россиянең Франциядәге вәкиле Александр Авдеев. Элекке министр Александр Соколовка исә яңа эш эзләргә туры киләчәк. Аңа бу эштә элекке юстиция министры Владимир Устинов ярдәм итә ала. Чөнки хәзер аның кәнәфиендә Президентның Идел буе федераль округындагы вәкаләтле вәкиле Александр Коновалов утыра. Шулай ук яңа Хөкүмәттә министр Владислав Путилинга да урын калмаган... Яңа Премьер, яңа Хөкүмәт, яңа министрлыклар, яңа кешеләр... Безгә дә яңа тормышка өметләнергә нигез бар кебек тоела.
Илмир ХӘБИБУЛЛИН |
Иң күп укылган
|