04.06.2012 Матбугат

Бердәмлектә - көч (Матбугат көне сабаклары)

Россия Журналистлар берлегенең Самара өлкә оешмасы Струковлар паркында XIX “Матбугат-2012” фестивален уздырды. Быел фестиваль өлкә Журналистлар берлегенең 55 яшьлегенә багышланган иде.

Матбугат чараларына битараф булмаган меңләгән кеше өчен самаралыларның яраткан бәйрәме бу юлы да программа төрлелеге һәм милли төсмерләре белән шатландырды.

Бәлки, хәтерлисездер, үткән елгы фестивальдән соң безнең газета “Струковлар паркының “телсез күкеләре” мәкаләсе белән ачуын баскан иде. Дөрестән дә, 17 ел буе үзебезнең мәйданчыкны оештырып, дистәләгән укучыларыбызга да, үзебезгә дә бәйрәм ясаган газетаны телсез калдырсыннар, ди, инде.

Аллага шөкер, былтыргы сабак файдага булды. Бу юлы Халыклар дуслыгы йортында чыгучы “Бердәмлек” татар, “Ыргыз” башкорт, “Самар ен” чуваш, “Очаг” азәрбайҗан, “Проминь” украин, “Эне тиль” кыргыз, “Валдо ойме” “Масторава” мордва, “Ак жол” казах газеталарының мәйданчыгы аерым булып, без киемнәр, җырлар төрлелеге белән башкалардан аерылып тордык.

Беркемгә дә сер түгел, элек 17 кешедән торган “Бердәмлек” коллективы, базар мөнәсәбәтләренә керү сәбәпле, биш кешегә калды. Әлбәттә, бу состав белән элеккегечә зур бәйрәмнәр оештырып булмый инде. Шуны истә тотып, без татар милли оешмаларының һәрберсенә хатлар җибәреп, ярдәм итүләрен соралдык. Беренче булып Фәхретдин Канюкаев җитәкчелегендәге “Дуслык” өлкә һәм “Ак бәхет” шәһәр иҗади-иҗтимагый оешмалары ярдәмгә ашыктылар. Ике атна алдан оешманың егетләре һәм кызлары төрле уеннар әзерли, җырлар өйрәнә башладылар, Азат Әмиров исемле җырчы егетне табып китерделәр. Оешманың идеологы Идеал Галәүтдинов, 22 ел элек үзе дә “Бердәмлек”тә эшләп киткән кеше буларак, редакциягә килеп, безнең белән репетицияләр ясап йөрде. Һәм шулай сизелми генә көтелгән бәйрәм килеп тә җитте.

Традиция буенча бәйрәмне Самара өлкә журналистлар оешмасы рәисе Ирина Цветкова һәм шәһәр мэры Дмитрий Азаров ачып җибәрделәр. “Пресса фестиваленең Шәһәр көне белән туры килүе очраклы хәл түгел. Самаралылар бөтен шәһәр һәм өлкә яңалыкларын сездән белеп торалар. Самараның көндәлек матбугат чаралары башкалардан азатлыгы, четерекле темаларны читләп үтмәве белән аерылып тора. Бу хакимият органнарына уңышлы эшләргә ярдәм итә, барлык җитештерүче тармаклар, иҗтимагый оешмалар белән хезмәттәшлек итәргә мөмкинлек бирә. Самарада шундый талантлы, эш сөючән, битараф булмаган журналистлар эшләве белән мин горурланам. Без - коллегалар, чөнки барыбыз да Самараның киләчәген кайгыртабыз, димәк, аны яхшырак итү өчен тырышабыз”, - диде Дмитрий Азаров.

Шуннан китте җырлар, викториналар, конкурслар. Берсен-берсе уздырырга тырышып, 26 матбугат чарасы 18 мәйданчыкта тамаша күрсәтте. “Самарская газета” быел 5000нче номеры дөнья күрү уңаеннан электрон китап уйнатты, “Право” газетасы пилотсыз самолет очырып, Струковлар бакчасының бөтен мәйданчыкларын зур экраннан күрсәтеп торды, “Тюрьма и воля” үзенең мәйданчыгына “Выстрел” бронемашинасын китереп куеп, балаларны гаҗәпкә калдырды. Әлбәттә инде, аларның “полевая кухня”сы янында да халык күп булды, барысы да ботка белән сыйландылар.

Ә балалар һәм олы буын кешеләре күбесенчә безнең “Бердәмлек” мәйданчыгы тирәсендә бөтерелде. Иртән иртүк “Призны үзең кисеп ал” конкурсын әзерләп, бауга тагылган призларны агачның бер ягына гына элеп калдырган идек. Фестивальне ачу тантанасыннан урыныбызга килеп карасак, балалар призларны күзләренә яулык бәйләмичә дә яхшы өзгәннәр икән. Нишлисең бит, ярар, садака булсын, дидек тә, “Дуслык” һәм “Ак бәхет” егетләре-кызлары балалар арасында конкурслар, уеннар оештырып җибәрделәр. Шунда каяндыр бер төркем малайлар килеп чыктылар да, безнең татар уеннарында катнаша башладылар. Тора-бара кызып киттеләр бит болар: инде приз көтеп тә тормыйлар, берәр-берәр дә, төркем-төркем дә аркан тартышалар, кашыкка күкәй салып йөгерәләр, тапкырлыкта сынашалар...

Сәхнәдә сүз беренче булып безнең газетага бирелде. Баш мөхәрриребез Рәфгать Әһлиуллин тамашачыларны сәламләгәннән соң, дуслыклылар “Татарлар килә”, Азат Әмиров “Ак каен” җырларын, Идеал Галәүтдинов тальян гармунында уйнап, “Герман көе”н башкарды. Идеал абый сәхнәдән төшкәч, безне әле бераз биетеп тә алды.

“Бердәмлек” өстәлендә, һәрвакыттагыча “Бердәмлек”нең якын дусты Разия ханым Әюпова үзенең “Татар кафесы”ннан алып килгән чәкчәк, кош телләре, манты, самсалар урын алган иде. Шәһәр мэры яныбызга килеп туктагач, ул аны чәкчәк белән сыйлады. Соңрак узган-барган кешеләр дә, Халыклар дуслыгы йорты эшмәкәрләре дә сыйландылар һәм Разия ханымга рәхмәтләрен әйтеп киттеләр.

Без дә Разия Әюповага, “Дуслык” Һәм “Ак бәхет” оешмалары кызлары - егетләренә, аларның җитәкчеләре Фәхретдин Канюкаевка, Рәфыйк Бадамшинга, Римма Нуретдиновага рәхмәтләребезне белдереп, киләсе очрашуларга кадәр аерылыштык.

Ә сәхнәдә бәйрәм дәвам итте - һәр милли газетаның редакторы үзенең газетасы турында сөйләде, милли җырларын яңгыратты, биюләрен күрсәтте. Бигрәк тә белорус халкының дуэты дәррәү алкышлар яулады. Самара өлкә хөкүмәте аппаратының иҗтимагый оешмалар һәм депутатлар корпусы белән элемтә идарәсе җитәкчесе Дмитрий Холин, шәһәр мэры Дмитрий Азаров та этник газеталарның, милли мәдәниятләрнең үзенчәлегенә соклану белдерде. Шуңа күрә дә “Бердәмлек” газетасы “Самара өлкәсенең милли-мәдәни мирасын пропагандалау өчен” дипломы белән бүләкләнде.

Ә фестивальнең җиңүчеләре булып “Волжская коммуна”, “Самарская газета”, “Тюрьма и воля”, “Право”, “Терра” телерадиокомпаниясе танылдылар.

Бәйрәмгә килгән милләттәшләребезгә барысы да бик ошады, тик бер нәрсә генә борчуга салды: “Ник соң татарлар гына башка милләт вәкилләре кебек милли киемнәрен киеп килмәгәннәр?” - дип берничә кеше баш мөхәрриргә урынлы сорау бирде. Бу сабакны киләсе ел фестивалендә исәпкә алырбыз, әлбәттә. Тик моның өчен бөтен иҗтимагый оешмаларыбызга да берләшү кирәк. “Бердәмлектә - көч”, - дип юкка гына әйтмиләрдер шул.