«МАТБУГАТ.РУ»ДА ФИКЕР АЛЫШУ КАГЫЙДӘЛӘРЕ

«МАТБУГАТ.РУ»ДА ФИКЕР АЛЫШУ КАГЫЙДӘЛӘРЕ 

1. Комментарий язганчы ныклап уйлагыз. Һәр язган сүз өчен сез үзегез җаваплы, сайт администрациясе түгел.  

2. Оппонентыгызны хөрмәт итегез. Һәр кешенең үз фикере бар. Һәм ул аны әйтергә хокуклы. 

3. Тәнкыйть хуплана. Әмма ул конструктив һәм тема буенча булырга тиеш. (Шәхеснең керен чайкау, аталарын яки балаларын барлау, темага кагылышы булмаган фактлар казып чыгару, имеш-мимешләргә таянып фикерләү, “ахмак”, “надан”, “тиле” сүзләрен куллану – конструктивлык  билгесе түгел.) 

4. Юридик таләпләргә җавап бирми торган постлар сайт администраторлары тарафыннан бетерелә. (Мәсәлән, суд карары булмаган килеш кешене җинаятьче дип атау, коррупциядә гаепләү, яла ягу, милләтара низаг чыгарырга тырышу, революциягә өндәү һ.б.).  

5. Юридик таләпләрдән тыш әхлакый таләпләргә җавап бирми торган постлар бетерелергә мөмкин. (Кешене кимсетү, аның исемен махсус рәвештә үзгәртеп язу, янау, каргау, шантажлау һ.б. Комментарий сөртелгәч: “монда цензура икән!”, “сез куркак!”, “сезгә кем түли?”, “сайт татарга каршы эшли!” кебек бәргәләнүләргә сайт администрациясе тыныч һәм битараф карый).  

6. Әгәр кем дә булса “башка кермим!”, “башка язмыйм!” дип чыгып китә икән, артыннан “таш атып” калмагыз. (Һәм борчылмагыз да. Гадәттә, алар башка исем белән яза башлый, яисә бераз вакыт узганнан соң үз исемнәре белән “яңадан туа”). 

7. Шәхес, балалар, милләт, дин мәсьәләләренә кагылышлы комментарийлар язганда аеруча зур җаваплылык сорала. 

8. Сүгенү сүзләре язу тыела. (Сүгенү сүзендә бер-ике хәрефне йолдыз белән алыштырып кына ул сүгенү сүзе булудан туктамый). 

9. Спам һәм флуд тыела. (Администраторлар тарафыннан бер бетерелгән комментарийны икенче тапкыр язу мәгънәсез. Бу – вакытны бушка үткәрү).  

10. Алдан килешмичә, реклама язу тыела. (Шул ук вакытта “Матбугат.ру” тәкъдим иткән рекламага карата  лояль булуыгызны үтенәбез. Реклама булмаса – “Матбугат.ру” да булмас иде). 

11. Татар җөмләләрен татар хәрефләре белән язу хуплана. (Шулай да, әгәр мондый мөмкинчелек юк икән, “ә” урынына “э”, “ү” урынына “у” куллану да зур гаеп түгел). 

12. Фактик, мәгънәви, орфографик, стилистик хаталар өчен сайтны, язма авторларын һәм комментарий язучыларны тәнкыйтьләү хуплана. (Тик тенхик хаталрада  хәреф чүлпәү  – акылыллык билгесе саналмый).  

13. Уен-көлке, шаян сүз, төртмә тел белән язу хуплана. Әмма алар низаг чыгуга сәбәп булмаска тиеш. (Киресенчә, юморны киеренке бәхәсне җиңеләйтү, кешеләрне дуслаштыру  өчен файдаланыйк).