“Бу безнең өчен шок...”

Авария 11 мартта Екатеринбург-Төмән трассасының 78нче километрында, Богданович шәһәре янында була.

 

Бу көнне 45 яшьлек Владимир якыннары белән Төмәннән Уфага юл тота. Гаилә утырган Toyota минивэны юл кырыена туктый. Кузгалырга җыенган вакытта аларга җиләк ташучы йөк машинасы килеп бәрелә.

 

 Авариядә водитель һәм җиңел автомобильдәге тагын алты кеше, шул исәптән хатыны һәм аларның бер яшьлек баласы зыян күрә. Нәтиҗәдә, Владимир нык авыр җәрәхәтләр ала. Аның таз сөякләре сына һәм эчке органнары өзелә. Аны Каменск-Уральск дәваханәсенә илтәләр, операция ясыйлар һәм реанимациягә күчерәләр. Табиблар берничә көн пациентның гомере өчен көрәшәләр, ләкин җәрәхәтләр үзенекен итә. Ул дәваханәдә җан бирә...

 

Туганнары әле булса бу хәлгә ышана алмый. Ә иң авыры – Владимирның 45 яшьлек хатынына, чөнки ул 9 бала белән ялгызы калган, өч балага 4 яшь тә тулмаган.

 

 “Бу безнең өчен шок. Авариядән соң хәле авыр, әмма тотрыклы иде. Күрәсең, йөрәге күтәрә алмаган. Хәзер гаиләгә ярдәм кирәк”, – ди хатынның туганы.