01.02.2024 Хәвеф-хәтәр

Мәктәп балалары җиңел генә акча эшләргә уйлаган

Русия Эчке эшләр министрлыгының Стәрлетамак шәһәре буенча бүлегенә мошенниклык турындагы гариза белән 84 яшьлек әби мөрәҗәгать иткән. Пенсионер хатын сөйләвенчә, аферистлар аңардан “Сезнең туганыгыз юл һәлакәтенә эләкте!” дигән схема буенча акча алырга маташкан.

Әлегә билгеле булуынча, гариза язган ханым телефонына билгесез номердан бер адәм шалтыраткан да, үзен полиция хезмәткәре дип таныштырып, киленегез авария ясады һәм ул гаепле дип хәбәр иткән. Мошенниклар җинаять җаваплылыгыннан кача алу мөмкинлеге өчен 100 мең сум акча таләп иткән.

Шалтыратучы курьерларны җибәргән һәм ханымнан кулакча бирүен сораган. Нидер сизенгән пенсионер хатын полициягә шалтыратырга уйлаган. Курьерлар акча артыннан килгәндә аларны патруль-пост хезмәте полицейскийлары көтеп торган инде. Алар Стәрлетамак мәктәпләренең берсендә укучы 17 яшьлек шикләнелүчеләрне тоткарлаган.

Соңрак мәктәп укучыларының курьер булып эшләүләре ачыкланган, тоткарланган моментта алар заказ үтәгән. “Эш”не алар мессенджерларда тапкан. Малайларның бурычлары “эш бирүче” әйткән адреслар буенча акчаларны алып, күрсәтелгән банк исәпләренә күчерүдән гыйбарәт булган. Әмма үсмерләр беренче эш көнендә үк тотылган.

Тоткарланган үсмерләр барын да ачыктан-ачык сөйләп биргән. Алар, имеш, үзләренең махинацияләрдә катнашуларын белмәгән, нибары кушылган эшне генә үтәгән.

Чыганак: bashinform.ru

Әлфия ШАКИРҖАНОВА
Өмет
№ --- | 01.02.2024