Ирем: «Нина, янабыз ич!» - дип кереп кычкыргач, өстемдә җәйге сарафаннан чыгып йөгердем...

Кыш уртасында бер кат кием белән урамда басып калган хуҗаларны бүген күршеләре сыендырган. Ышанырлык та түгел, 3 ел элек Наратлы Кичү авылында иске генә йорт сатып алган Зульмиевларның шушы көнгәчә төзекләндергән, корган, җитеш итәргә тырышкан йортлары бер сәгать эчендә көлгә әйләнгән.

 

- Безнең икебезне дә язмыш моңа кадәр дә җитәрлек сынаган иде... Илгизәрнең дә, минем дә икенче никахыбыз, кителгән бәхетләрне түгәрәкләп, кулга бер чемодан тоткан килеш кушылган ярлар без. Эшләп алган фатирын ул да балаларына калдырды, мин дә улыма бирдем.

 

Авылга күченсәк тә, икебез дә көн саен Чаллыга йөреп эшләдек. Мин - балалар бакчасы мөдире, Илгизәр абыегыз - автомеханик. Тормышларны тезләнгән җирдән күтәрдек. Янкорма эшләттек, түбәсен, тәрәзәләрен алмаштырдык, тышладык, түшәмнәрне заманча иттек. Уч төбенә сыярлык иске йортыбыз 100 квадрат метрлыга әйләнде, иркенәйде. Йокы бүлмәсенә генә обойлар ябыштырасы калган иде. 3 се көнне иртән чәйләгәч, Илгизәр кар көрәргә чыгып китте. Мин обой ябыштырырга керештем. Илгизәр: "Нина, янабыз ич!" - дип кереп кычкыргач, өстемдә җәйге сарафан иде, шул килеш чыгып йөгердем. Иске йортка терәп эшләнгән янкорма почмагыннан төтен бәрә иде, ике дигәнче ялкынланып та китте. Кыска ялганыштан ут чыккан дип аңладык. Коедагы насосны кабызып, шланга белән су да сиптереп карадык, сүндерә алмадык. Күршеләр дә йөгерешеп керделәр, халык та тиз җыелды. Ирләр көрәк белән утка кар атты. Авылдагы утны сүндерделәр дә, насослар да эшләүдән туктады - сусыз калдык, - ди Нина ханым.

 

Янгын сүндерү машиналары килеп җиткәнче, берәр сәгатьләп вакыт үтте, дип сөйли әңгәмәдәшем. 112 хезмәтенә шалтырата ул. Анда кирәкле ярдәмне чакырту өчен, командалы тәртиптә номерлар җыярга кирәк, дип аңлата. Менә шунысы буталдыра аны, Нина ханым элемтәне әллә ничә өзеп, әллә ничә мәртәбә җыеп карый да, ахыр чиктә тузынып, телефонын читкә ата.

 

- Авылга су кермәгән. Наратлы Кичү авылы Чаллы шәһәреннән 40 чакрым ераклыкта гына, ә халкы узган гасыр шартларында яши. Кайтып төпләнгән беренче көннән үк авыл җирлеге башлыгы белән әрләшәм. Халыкны үзәкләштерелгән су белән тәэмин итәргә кирәк, әгәр дә берәр йортка ут капса, шырпы тартмасы кебек, күз ачып йомганчы дөрли-дөрли янып бетәчәк дип, гел кисәтә идем, менә шул көн килде дә. Хәл алгач, авыл җирлеге башлыгының янына кабат төшәм. Бу юлы авылны сулы итмичә туктамыйм инде. "Чиста су" программалары бар бит, җиң сызганып эшләргә генә кирәк. Халык чарасызлыктан үз ихатасында кое казыткан. Ут барында насослар эшли дә, ут беткәч, сусыз утыралар, - ди ул. 

 

Әңгәмәдәшем сүзләрендә хаклык зур. Нәкъ менә бер тамчы суга тилмерүләре ялкын телләренә ирек биргән түгелме?

 

- Өйгә кереп документларны гына алып чыга алдым. Юл уңаенда култык астына ике мендәр кыстырдым. Аяк киемнәребезне булса да иелеп ала белмәгәнмен. Бар нәрсә янды. Ир-атлар кереп, микродулкынлы мич, суыткыч белән туңдыргычны алып чыктылар, аларны бер ай элек кенә сатып алган идек. Кер юа торган машинабыз да өр-яңа килеш янды, бар малыбызны ут юк итте. Токымлы песиебез дә ут эчендә калды бит, ашыгычлык белән оныткабыз үзен, - ди Нина ханым.

 

Куян-кәҗәләре, бозаулары уттан имин калган анысы. Мунча белән сарайлары исән, шөкер. Нина ханым авыл халкына бик рәхмәтле. 

 

- Берсе итеген салып, минем галошымны киде, икенчесе өстендәге тунын бирде. Өченчесе башыма шәл китереп бәйләде. Урамда бит - 24 градус суык! Әле берсе, әле икенчесе үзләренә чәйгә чакыра: "Син йөрәгеңне бозып, карап торсаң да, тормасаң да, өең яна, безгә кайтабыз", - диләр. Зур сынау инде бу, - ди ул. - Илгизәр бик борчыла. Һәр нәрсәне үз кулыбыз белән эшләдек, күршеләр, авыл халкы ярдәмгә килә иде. Бернәрсәсез, ике мендәр кыстырып, урам уртасында басып калдык.

 

Зульмиевлар гаиләсенә бүген бик авыр. Алар язга чаклы күршеләре - Илсур белән Гөлшат йортында яшәргә мәҗбүр. Ә язын йорт салырга исәпләре. Бүгенге көннәре дә авыр, иртәгәсе көндә дә әле җиңеллек көтми. Хәлдән килгәнчә, үзләренә ярдәм итик. Ил төкерсә - күл җыелыр, дигән борынгылар. Без дә бу гаиләгә мәрхәмәтле булып, хәлдән килгән кадәр изгелек кылыйк. Матди ярдәм итү өчен телефон: 89063339902 Никишин Антон Юрьевич(Нина ханымның улы) Сбербанк, Ак Бар картасына беркетелгән