"Баламны табиблар карамый үтерде"

Бу елның 14 ноябрендә ике яшьлек Артемның әти-әнисе бала табиб хатасы аркасында вафат булды, дип белдерә.

 

10 ноябрьдә, Артемны, гадәттәгечә, балалар бакчасыннан алып кайталар. Бала үзен яхшы хис иткән кебек тоела, өйдә уйный. Йоклар алдыннан гына ике тапкыр коса. Төнлә температурасы күтәрелә. Шимбә иртәсендә дәваханәгә алып баралар.

 

- Кабул итү бүлмәсендә аны беркем дә карамады. Баламның хәле начар дип әйттем. Ә безгә, имеш, бу табиб юк, еге табиб юк, дип сөйли башладылар. Безне тикшермичә, бернинди ярдәм күрсәтмичә, поликлиникага җибәрделәр, безнең табиб анда, дип әйттеләр. Мин кабул итү бүлмәсендә безне тикшермәүләренә шаккаттым, - ди әнисе.

 

Хатынга улы белән педиатр янына барырга туры килә. Ул, ниһаять, баланы карый, тик бернәрсә дә әйтми, ибупрофен һәм зиртек язып бирә, сыекчаны күбрәк эчәргә куша. Ә дүшәмбе көнне анализлар тапшырырга ди.

 

Алдан куелган диагноз "ротавирус" булган. Хатын бераз тынычлана, чөнки табиблар баланың хәле турында бернәрсә дә әйтми. Төн буе һәм икенче көн дәвамында ата-аналар табибларның киңәшен үтәгәннәр сыекча эчерткәннәр, ибупрофен биргәннәр.

 

Дүшәмбе гаилә дәваханәгә анализлар тапшырырга килгән. Кич белән табиб янына кабат килергә кирәк булган. Башка пациентлар Артемны чиратсыз кертә, чөнки аның температурасы югары була.

 

- Мин табибка улымның ятып торуын, тора алмавын, температураның төшмәвен аңлаттым. Ул аны тыңлады. Ләкин безне беркая да җибәрмәде. Нигә антибиотиклар язмыйлар дип сорадым. Ул анализларны көтәргә кирәк дип җавап бирде. Температурадан таблеткалардан башка бернәрсә дә билгеләмәде. Прививка бүлмәсенә җибәрде, анда аңа димедрол белән анальгин кададылар. Һәм өйгә кайтарып җибәрделәр, - дип искә ала хатын.

 

Кич җиткәч, хатын-кыз анализлар алырга килгән. Малайда җитди үпкә ялкынсынуы булуы ачыкланган.

 

Аннары аның хәле бөтенләй бетә. Дәваханәгә алып киләләр. Табиблар йөгерешә башлый.

 

Төнлә Артемның йөрәге тибүдән туктый. Шуннан соң гына анда ике яклы пневмония булуын әйтәләр.

 

Өч көн элек йөгереп йөргән баланы менә шулай харап итәләр. Ата-ана табибларны гаепли. Бу эш буенча тикшерү бара. 

фото: социаль челтәрләрдән

Автор:Резеда Галикәева