Роберт Миңнуллин бүген исәннәрдән дә исән

Ул – чын халык шагыйре! Аның әсәрләрен олылар да, балалар да йотлыгып укый, иҗатына мәңгелеккә гашыйк була.

 

«Әнкәй безне Сөннән алып кайткан» дигән җыры аның үз автобиографиясе буларак кабул ителә. Роберт Миңнуллин - әдәбиятыбызга тиңдәшсез әсәрләр биргән шагыйрь, бик күп җырлар авторы, җәмәгать һәм дәүләт эшлеклесе, олы җанлы гаилә башлыгы да. Татар язучысы, шагыйре, драматургы һәм әдәбият белгече Галимҗан Гыйльманов Роберт Миңнуллин иҗаты турында: «Әдәбият казанында азмы-күпме кайнаган кеше буларак, төгәл әйтә алам: әдипләрнең асыл талантын билгели торган бер бизмән бар. Ул – аларның өлкәннәр өчен дә, нәниләр өчен дә бердәй талантлы әсәрләр иҗат итә алулары. Роберт Миңнуллин әнә шундый шагыйрьләрдән", - дип әйткән. 

 

Чыннан да, ул искиткеч гади һәм тыйнак кеше иде. Робер ага Миңнуллинны Самараның татар җәмгыяте дә бик яхшы белә. Ул безнең шәһәрдә узган берничә милли чараның мөхтәрәм кунагы буларак катнашты. 2014 елда узган "Татар поэзиясе кичәсе"нең, "Мирас" халыкара конкурс-фестиваленең кунаклары һәм тамашачылары аны нәкъ менә гади, ачык йөзле, киң күңелле, олылар белән дә, сабыйлар белән дә бик тиз уртак тел таба белүче гаять кызыклы әңгәмәдәш буларак  хәтерлиләр. Күпләренең архивында Роберт абый белән төшкән фотосурәтләр чын тарихи истәлек булып саклана. Аның бәрхет сыман йомшак тавышы, серле күз карашы мәңге онытылмас.

 

Роберт Миңнуллин бүген дә исәннәрдән дә исән. Ул җырларында, шигырьләрендә мәңге яшәячәк. Аның иҗаты озак еллар дәвамында заманча һәм актуаль булып калачак.