«Сынау артыннан сынау: ирем яман чирдән үлде, улымны машина таптатты»

– Улым Динислам белән сөйләшеп торабыз. Өйгә кайтырга телим, ди. Аны бик сагынабыз һәм тизрәк савыгуын телибез. Табибларның фаразы яхшы. Янында караучы хатын бар. Аның хезмәте өчен тәүлегенә 3 мең сум түлибез. Тиздән хастаханәдән чыгарырлар дип өметләнәбез, – дип сөйләде безгә әнисе Чулпан Имамова. 

 

Әни кеше сүзләренчә, юл һәлакәте Чаллыда 27 июль көнне 19.45 сәгатьтә килеп чыга. Динисламның «Чишмә» мәчетенә кичке намазга барышы була. Җәяүлеләр өчен юл кичүе аша үткәндә малайны “Ланд Ровер” машинасы бәрдерә. Рульдә 45 яшьлек ир-ат була.

Авыр хәлдәге баланы Чаллы Ашыгыч медицина ярдәме хастаханәсенә алып киләләр.

 

– Кечкенә пациентыбызның хәле бик авыр дип бәяләнде. Баш мие җәрәхәтләнгән, эчке органнары өзелгән, аягы сынган иде, шунда ук операция өстәленә салдык. Соңрак, аны Республика балалар клиник хастаханәсенә күчердек. Бәхеткә, хәзер баланың хәле тотрыклы, ул реанимация бүлегеннән хирургия бүлегенә күчерелде, – дип сөйләде безгә Республика клиник хастаханәсе каршындагы Республика һәлакәтләр медицинасы үзәге җитәкчесе Марина Воронцова.

Динисламны 29 июльдә Казанга алып киләләр. Биредә бала нейрохирургия бүлеге табиблары карамагына тапшырыла.

 

– Табиблар әйтүенчә, улыма бик озак вакыт реабилитация курсын үтәргә кирәк булачак, – ди Чулпан Имамова. – Юл һәлакәтенә чаклы Динисламның кулына операция ясаткан идек, гипс белән йөрде. Гаиләбезгә бер-бер артлы сынау килә торды. Әмма иң мөһиме – Динислам могҗиза белән исән калды. Ул көчле, нык ихтыярлы бала, минем уң кулым. Балаларым инсафлы, намаз укыйлар. Ә юл һәлакәтенә килгәндә, машина белән идарә иткән ир элемтәгә чыккан иде. Сөйләшә алмадым, вакытым юк әлегә. Тикшерү бара дип беләм. 

 

Чулпан Имамова, сынауларны сабырлык белән үткәреп җибәрергә язсын, ди. Ярый ла янәшәсендә генә әнисе бар. Олы яшьтә булуына карамастан, балаларның әбисе әле дә эшләп йөри. Кызы һәм аның балаларына булыша. Чулпанга биш баласын аякка бастырырга кирәк бит. Беренче баласына 16 яшь, аннан соң гаиләдә тагын игезәкләр туган. Динисламга һәм Исламга 12шәр яшь, нәкь ун елдан Чулпан янә ике игезәк кыз бала таба. Бәләкәчләргә хәзер 2 яшь тә дүрт ай.

 

– Узган ел безнең өчен бик авыр ел булды. 2022 елның 14 июнендә ирем Айзат яман чирдән үлеп китте, – дип сөйли әни кеше. – Тумышым белән Чаллыдан мин. Айзат белән туганнарыма Актаныш районы Күҗәкә авылына кунакка кайткач танышкан идем. Өйләнешкәндә миңа 20 яшь иде. Бер-беребезне бик яратып, кайгыртып яшәдек. Айзат “КамАЗ” җәмгыятендә эшләде, үзенең авыруы турында берни дә белмәде һәм ике ай эчендә онкологиядән “янды”. Табиблар төгәл диагноз куя алмады шул. Ирем үлгәннән соң, өйдәге барлык эшләрне улым Динислам үз өстенә алды. Ул тач әтисенә охшаган, энергияле, кулы эшкә ятып тора. Без аны «зур кеше» дип атыйбыз. Хәзер зур гаиләм туендыручысын югалту буенча пенсиягә яши, балаларга пособие алам. 2019 елда ирем белән ипотекага дүрт бүлмәле фатир алдык, аның өчен 17 ел дәвамында ай саен 15 мең сум түләргә кирәк.

 

Чулпан үзе декрет ялына чыкканчы Чаллы Ашыгыч медицина ярдәме хастаханәсендә шәфкать туташы булып эшләгән.

 

– Гаиләбез өстенә төшкән сынау турында белгән таныш, хәтта таныш булмаган кешеләр дә ярдәм итә. Бик рәхмәтлемен. "Чишмә" мәчете, Тукай районы мәчете дә ярдәм күрсәтте, – ди Чулпан. – Ашыгыч медицина ярдәме хастаханәсендә эшләүче хезмәттәшләрем, иремнең хезмәттәшләре дә читтә калмады. Шәһәребездә игелекле, ярдәмчел кешеләр күп булуына чиксез шатмын. 

 

Чулпан Имамова гаиләсенә ярдәм күрсәтергә теләүчеләр өчен аның телефоны: +7 906 120-87-62 (Сбербанк картасы шушы номерга беркетелгән).

Фото: freepik.com