Җиде балалы гаилә бернәрсәсез урамда калган: «Әни, без кайда яшәрбез?»

– 24 июньдә кичке якта булды бу хәл. Ул көнне без барыбыз да иремнең апаларына мунчага дип барырга чыккан идек. Өйдән чыгып китеп, 20–30 минут вакыт узгач, күршебез: «Йортыгыз яна», – дип шалтыратты. Ирем шундук өйгә йөгерде. Мин аның артыннан кайттым, – дип ул көнне искә алды Гөлүсә ханым. – Без кайтып кергәндә, йорт эче төтен белән тулган иде. Документларны гына алып чыга алдык. Тиз арада өебез янып та бетте.

 

Гөлүсә ханым әйтүенчә, балаларның иң зурысына – 13, кечкенәсенә – 4 яшь. Йортлары янгач, гаилә бер атна тирәсе туганнарында яшәгән. Хәзерге вакытта алар фатир арендалап тора.

 

– Йортның стеналары гына утырып калды. Башта яңартмакчы идек, килеп чыкмаслыгын аңлагач, анысын да сүттек, – ди Гөлүсә Мәрданова. – Матур гына яшәп ятканда бернисез калу бик авыр, әлбәттә. Беренче уй «Кая барырбыз? Нишләрбез икән?» булды. Балалар аеруча нык борчыла. Янгын булган көнне дә, аннан соң да барысы да бертуктаусыз: «Әни, без кайда яшәячәкбез?» – дип кабатлады. Әле ярый ул көнне беребез дә өйдә юк иде. Иң мөһиме – барыбыз да исән-сау.

 

 

Йортлары янган гаилә белән район башлыгы Михаил Афанасьев та очрашкан. Булдыра алганча ярдәм итәргә вәгъдә биреп озаткан да «Ханский дом» оешмасы җитәкчесе Ильяс Гыймадовка мөрәҗәгать иткән. Шуннан соң эшмәкәр социаль челтәрләрдә акча җыюны оештырган. Җыелган акчага гаиләгә йорт салып бирәчәкләр. Йортны сафка бастырыр өчен якынча 4–5 млн сум акча кирәк икән. Хәзерге вакытта счетта 1 миллион сум тирәсе акча җыелган. Төзелеш эшләре инде башланып та киткән. Ниятләре – суыклар башланганчы гаиләне яңа, матур йортлы итү. Йорт каркастан булачак. Хәзерге көндә аның идәннәрен җәяләр. «Иң мөһиме – балаларга яшәр өчен тиз арада уңайлы шартлар тудыру», – ди Ильяс Гыймадов.

 

– Яшел Үзәннән дә вакытлыча торып торырга фатир тәкъдим иткәннәр иде, тик балалар өчен уңайсыз була, дип уйлаштык. Алар шушы авыл мәктәбенә укырга йөри. Ирем Марсель дә Карагуҗа авылына барып эшли. Мин бу фаҗига булганчы кибеттә эшли идем, хәзер буш вакыт күп кирәк булганлыктан, аннан киттем. Вакытлыча башка эшкә урнаштым. Авылдашларга, безне бер белмәгән кешеләргә, район башлыгына бик зур рәхмәт. Безне кайгыбыз белән ялгыз гына калдырмадылар. Акчалата да, киемнәр белән дә ярдәм иттеләр. Социаль челтәрләрдә әле дә акча җыю дәвам итә, – диде ул. – Бу кадәр игътибар булыр дип көтмәгән дә идек. Йорт салырга ярдәм итүләрен белгәч, сөенечтән нишләргә белмәдек. Бик зур рәхмәт. Кышка кергәнче яңа йортка күченергә хыялланабыз.

 

Янгыннан зыян күргән гаиләгә ярдәм җыю әле дә дәвам итә. Теләге булганнар акчаны Мәрданова Гөлүсә исемендәге картага күчерә ала. Ул 89393748584 (Альфа Банк) номерындагы телефон картасына беркетелгән.