Нурлатта калу өчен самолеттан сикергән

Әмма “кукурузник” дип аталган самолетта Казанга кадәр барып җитүне сәламәтлеге нык кешеләр генә күтәрә ала. Әле бит анысы да очканда оча, очмаганда юк. 12 урынлы самолетка билет алу да бары зур “блат” буенча гына. 

 

Шулай бер вакыт Казан аэропортына килдем. Ни кызганыч, самолетлар ул көнне Нурлатка очмый икән. Чистай аркылы Чирмешәнгә очыгыз, аннары үз шәһәрегезгә кайтырсыз, дип “тынычландырдылар” мине биредә. Ничек инде, минем бит Чирмешәнгә барганым да юк, ә Чистай бездән 120 чакрым. Шулай да Чирмешәнгә кадәр билет алдым. Үзәккә үтә торган кышкы салкын, салонда пассажирлар күп түгел. Очучыбыз башта ук кисәтте: Чистай аэропорты кардан чистартылмаган, бәлки сезнең дә ярдәм кирәк булыр, ди. Мин беренче булып ризалаштым һәм очучы утыра торган кабина янына ук “елыштым”.

 

Чистай аэропорты, чыннан да, кар эчендә булып чыкты. Очкыч җиңеллек белән җиргә төште, ике пассажир безнең белән саубуллашып, кар ера-ера шәһәргә таба атлады. Двигатель кабынды. Әмма... самолет урыннан кузгала алмады. Без дүрт пассажир да өнсез калдык.

– Әйдәгез, төшеп очкычны терткәләп карыйк, бәлки “чаналары” кузгалыр, - дип тәкдим иттем мин.

– Әйе, бәлки кузгалыр да, – дип җанланды очучы.

Очкычка әллә ни күп тә кирәкмәгән икән, безнең “булышлыгыбызны” тоеп “чаналар” шуып китте. Шул арада без сикереп самолетка утырдык.

– Афәрин, кызлар, егетләр, – дип мактады үзебезне очучы.

 

Аның кәефе күтәрелгәнен сизеп, тагын берничә сорау бирергә булдым: самолет Нурлат өстеннән очамы, нинди биеклеккә күтәрелә һәм мине үз аэропортыбызда төшереп калдыру мөмкинлеге юкмы?

– Юк, маршруттан тайпылу катгый тыела, әмма сикереп калу мәсьәләсен карарга була, карга батудан курыкмасагыз инде, – дип көлемсерәде пилот. Ә миңа шул гына кирәк тә.

– Нурлат өстеннән очабыз, биеклекне киметәм, сикерегез, – дип кычкырды пилот кинәт кенә. Берничә минуттан мин биек кар катламы каплаган ялан кырда ята идем инде. Исән-сау җиргә төшүемә шатланып, карга чумган киемнәремне каккаладым һәм “Фәнни коммунизм”, “КПСС тарихы”, “Философия”, “Журналистикада реклама” китаплары белән шыплап тулган зур чемоданымны сөйрәп алга кузгалдым...

 

Резедә Гиняева,

Нурлат районы

Фото6 пиксабай