|
|
Бүген кемнәр туган
|
|
Архив
|
29.11.2022 Җәмгыять
85 мең шешәдән зур йорт төзеп кергәннәрБер гаилә шампан шәрабы шешәләреннән йорт төзеп кергән. Моның өчен алар 85 мең шешә җыйган. Пермь шәһәре янында урнашкан бу үзенчәлекле йорт читтән караганда башкалардан әллә ни аерылмый да - тимер капка, сайдинг белән тышланган йорт, мунча. Ә якынрак барып, өйнең стеналарына күз салсаң, без күреп өйрәнгән бүрәнәдән яки кирпечтән түгел, шампан шәрабы шешәләреннән төзелгән.
- Ирем башта «Приусадебное хозяйство» дигән журналда бер хатынның шешәдән парник төзегәнен укыган, шуннан үзе дә шулай эшләп карарга булды, - дип сөйләгән пыяла йорт хуҗасы Зоя Николаевна Саначева. - Парникны ул джин-тоник савытларыннан ясады. Алар чүплек тулы, урам чатларында да күп - шуннан да җыйдык. 4 көн эчендә төзедек, - дигән ул.
Парник бик яхшы килеп чыккач, Саначевлар гаиләсе моның белән генә чикләнеп калмаган, шешәләрдән йорт салырга керешкән. Бу юлы инде алар бәләкәй савытлардан түгел, ә ныклы булсын өчен шампан шешәләре җыйганнар.
- Йорт өчен бик күп шешә кирәк, без аны бөтен гаиләбез белән ун ел дәвамында җыйдык. Нәтиҗәдә 4 ай эчендә йорт төзеп кердек, - дигән Зоя Николаевна.
Күңел кушуы белән генә проектсыз һәм плансыз төзегәннәр йортларын. Пыяла торакның гомум мәйданы - 100 квадрат метр, бүлмәләре күп: зал, аш-су бүлмәсе, йокы бүлмәләре, бәдрәф тә бар.
- Ул вакытта шампан арзан иде, халык күп ала иде. Шешәләрне берәмләп үзебез җыйдык, дуслар да ярдәм итте. Якын-тирә кафе һәм рестораннарга барып, шампан шәрабы шешәләрен ташламаска куша идек, көн саен шулай җыеп йөрдек. Нәтиҗәдә, 110 мең шешә җыелды, хәтта артык та булды әле - өйгә нибары 85 мең данә китте, - ди хуҗабикә.
- Башта без йортның почмакларын да шешәләрдән корырга уйлаган идек, ләкин дуслар, алай йортыгыз ныклы булмас, кирпечтән мендерегез, дип киңәш иттеләр. Шуңа күрә газобетоннан блоклар сатып алдык, - дигән Зоя Николаевна.
Пыяла йортлары ныклы корылган. Хуҗабикә шампан шәрабыннан ясалган калын стеналарын хәтта чүкеч белән суксаң дә ватылмыйлар дип сөйләгән. Йорт кышын да җылыны яхшы саклый, тәрәзә астыннан газ белән җылытучы нибары бер торба үтә.
Бу гаиләнең мунчалары да пыяладан.Пар салсаң, озакка чыдый, бик шәп мунчабыз, шешә җыеп йөрүебез бушка китмәде, игелеген күрәбез, шөкер, дип шатланып сөйләгән Зоя Николаевна.
Ләйсән КАСПРАНОВА |
Иң күп укылган
|