24.11.2021 Мәгариф

"БДИдан баш тартырга кирәк": Александр Бастрыкин совет мәктәбен кайтарырга чакыра

Русиянең Тикшерү комитеты рәисе Александр Бастрыкин хокук буенча гыйльми конференциядә бердәм дәүләт имтиханнары мәсьәләсен күтәреп чыкты. Ул БДИ укучылар өчен җәза булып тора, шуңа аны бетерергә һәм белем бирүнең совет системасына кире кайтырга кирәк дип исәпли.

“Әйдәгез, совет мәктәбен кайтарыйк. Ул дөньяда иң яхшысы булды, моны барысы да таныды. Закон тәкъдимнәре дә шул юнәлешкә борылырга тиеш. Ә БДИдан баш тартырга кирәк, чөнки ул яшьләр өчен ниндидер җәза булып тора. Бакалавриат, специалитетларны да бетерергә кирәк. Урта мәктәп, техникум, югары белем булганда барысы да яхшы эшли иде. Нинди патриотлар тәрбияләдек һәм тормышның бар өлкәләрендә дә нинди казанышларга ирештек”, – дип сөйләде Бастрыкин.

Шулай ук ул тарих китапларын һәм югары белемнең читтән торып укуга әйләнүен тәнкыйтьләде. Укытучылар белән студентлар арасында бәйләнеш юкка чыга, дип белдерде. Гомумән, яшьләрне “виртуаль тормышка бирергә” ярамый, үсеп килүче буын, кулына көрәк, кирпеч тотып, хезмәтнең нәрсә икәнлеген белеп үссен өчен төзелеш отрядлары булдырырга кирәк дигән фикердә Тикшерү комитеты рәисе.

Сүз юк: бу фикерләр өлкән буын кешеләренең күбесенең күңеленә хуш килгәндер, мөгаен. Әмма федераль басмаларның кайсыберләрендә Бастрыкинның әлеге сүзләрен шунда ук тәнкыйть утына алучылар булды. Укучылар да, укытучылар да, ата-аналар да БДИга күнегеп беткән һәм ул яшьләр өчен зур мөмкинлекләр ача, диючеләр табылды. Ни өчен Тикшерү комитеты җитәкчесе үзенә карамаган темага кагыла, дип сораучылар да табылды. Бер карасаң, мәгариф темасы ул һәркемгә кагыла инде. Кемнеңдер – баласы, кемнеңдер оныгы, һичьюгы туганнары мәктәптә укый. Һәм монда һәркем үз фикерен әйтергә хокуклыдыр, мөгаен.

Мәгариф өчен җаваплы ведомстволарга килгәндә, сентябрь аенда Мәгариф һәм фән өлкәсендә күзәтчелек буенча федераль хезмәт (Рособрнадзор) Бердәм дәүләт имтиханыннан тулысынча баш тарту нигезле булмаячак, бу белем бирү сыйфатын түбәнәйтәчәк дип аңлаткан иде. Шулай да алдагы елларда БДИның форматын үзгәртергә җыеналар. Вузларга укырга кергәндә традицион имтиханны да кулланырга мөмкин булачак дигән сүзләр бар. Үзгәрешләр балалар файдасына булыр дип ышанасы килә. Ни дисәң дә, бүгенге имтиханнар – зур стресс: сәламәтлеккә үз йогынтысын ясамый калмыйлар. Шунысын да онытмаска кирәк.

Фото: 62info.ru

Язгөл САФИНА
Өмет
№ --- | 24.11.2021