ДРАМАТУРГИЯ ӨЛКӘСЕНДӘ «ЯҢА ТАТАР ПЬЕСАСЫ - 2010» КОНКУРСЫНА НИГЕЗЛӘМӘ

Татарстан Республикасы мәдәният министрлыгы, Татарстан Язучылар берлеге, Г.Камал исемендәге Татар дәүләт Академия театры, «Яңа гасыр» телерадиокомпаниясе, «Казан утлары» журналы һәм «Татарстан яшьләре» газетасы драматургия өлкәсендә чираттагы «Яңа татар пьесасы-2010» премиясенә конкурс игълан итәләр.

Авторлар конкурска сәхнәдә куелмаган һәм матбугатта чыгарылмаган татар телендә иҗат ителгән пьесалар тәкъдим итә алалар; узган “Яңа татар пьесасы” конкурсларында катнашкан әсәрләр кабул ителми.

Конкурс ябык; псевдоним белән имзаланган әсәрләр (текстларның компьютерда яки язу машинкасында басылуы һәм электрон варианты булу шарт) 2 экземплярда кабул ителә; автор турында белешмәләр (фамилиясе, исеме, атасының исеме, туган елы, адресы һәм телефоны, кыскача иҗат биографиясе) ябыштырылган аерым конвертта тапшырыла.

Конкурс шартлары үтәлмәгән очракларда, ягъни әсәрнең авторы күрсәтелмәсә, яки автор турындагы мәгълүматлар дөреслеккә туры килмәсә, пьеса жюри тарафыннан бәяләнгәннән соң да конкурстан чыгарылырга мөмкин.

 Конкурска җибәрелгән пьесалар кире кайтарылмый һәм рецензияләнми, алар Г.Камал театры китапханәсендә сакланалар.

Пьесалар конкурска 2010 елның 31 декабренә кадәр кабул ителә. Текстларны почта буенча түбәндәге адреска җибәрүегез сорала: 420021, Казан шәһәре, Татарстан урамы, 1 йорт, Г.Камал исемендәге Татар дәүләт Академия театры, «Яңа татар пьесасы-2010» конкурсы.

Җиңүче авторлар акчалата беренче, икенче һәм өченче премияләр белән бүләкләнә.

Конкурс кысаларында дүрт номинация игълан ителә:

1. Махсус номинация – “Балалар һәм яшүсмерләр өчен пьеса”

2. 35 яшькә кадәрге яшь авторлар өчен аерым номинация, бу очракта автор ябык конвертның тышында номинация исемен һәм үзенең яшен күрсәтергә тиеш.

3. “Башка формат” – махсус номинация

4. Проза әсәренә нигезләнеп язылган инсценировка өчен премия

Моннан тыш Татарстан Республикасы мәдәният министрлыгы тарафыннан махсус премия билгеләнә.

Конкурска кабул ителгән әсәрләрнең сыйфатына карап жюри беренче, яки башка бер премияне бирмәскә, хәтта конкурсның үтәлмәве турында карар да чыгарырга мөмкин.

 Барлык премияләр дә конкурсның генераль һәм рәсми спонсорлары тарафыннан бирелә.

 Конкурс турында өстәмә мәгълүматларны конкурсның координаторы Гөлнур Гиматовадан 8 (843) 293-52-50 телефоны буенча яки kamalteatr@mail.ru электрон почтасы аша алырга мөмкин.

Конкурс 2 этапта уздырыла:

– 1 этапта (2011 елның 1 февраленә кадәр) жюри әгъзалары конкурска килгән барлык пьесаларны укыйлар һәм 2 этапка узган 10-15 пьесадан торган шорт-бит төзиләр. Бу шорт-бит массакүләм мәгълүмат чараларында һәм www.kamalteatr.ru интернет сайтында урнаштырыла.

– 2 этапта жюри җиңүче әсәрләрне билгели.

 Конкурста җиңеп чыгучы авторларның исемнәре 2011 елның 27 мартында игълан ителәчәк.

«Яңа татар пьесасы-2010» конкурсына җибәрелгән пьесаларны бәялиләр: жюри рәисе – Миркасыйм Госманов, жюри әгъзалары – Рәзил Вәлиев, Гали Арсланов, Фәрит Бикчәнтәев, Айгөл Габәши, Рәдиф Гаташ, Шамил Закиров, Илфак Ибраһимов, Нияз Игъламов, Дамир Самерханов, Илдар Хәйруллин, Исмәгыйль Шәрәфиев.

Конкурста җиңеп чыгучы пьесалар кулъязма хокукында махсус җыентыкта бастырыла, шулай ук театрларга сәхнәләштерү өчен тәкъдим ителә.