САМАРА ТӨБӘГЕНЕҢ «БЕРДӘМЛЕК» ГАЗЕТАСЫ

Самара өлкәсендә чыгучы «Бердәмлек» татар газетасы 1990 елның 25 апреленнән бирле атна саен 8 битле булып дөнья күрә. Яз көне өлкәбездә яшәүче татарларны бердәмлеккә, дуслыкка чакыручы бу милли басма үзенең 20 еллыгын билгеләп үтәчәк. Ә үткән елның июль аенда аның 1000нче саны чыккан иде.

Самарада әле унтугызынчы гасыр башында ук берничә татар газетасы нәшер ителгән. Шуларның иң соңгысы, «Колхозчы» дип аталганы, 1938 елда чыгудан туктатылган, һәм бары тик илле ел чамасы вакыт үткәннән соң гына Самара төбәгенең татар җәмәгатьчелеге тырышлыгы белән татар телендә өлкәбездә «Бердәмлек» газетасы чыга башлады.

 Милли басманы дөньяга күрсәтү өчен бөтен көчләрен биреп, беренчеләрдән булып армый-талмый йөрүчеләр арасыннан Бөтендөнья татар конгрессы башкарма комитетының алыштыргысыз, мактаулы әгъзасы, Самара төбәгенең мәшһүр татары, үткән елда үзенең 80 яшен тутырган Равил ага Яһудинның, өлкә «Туган тел» татар җәмгыятенең беренче әгъзалары Рәшит Абдуллов, Мансур Ямалетдиновның һәм 20 ел буена газета белән җитәкчелек итүче «Бердәмлек»нең баш мөһәррире Рәфгать Әһлиуллинның исемнәрен атарга була.

1990 елда беренче дөнья күргән «Бердәмлек» атна саен дүрт биттә басылган булса, тора-бара ул сигез битле булып, бүгенге көнгә кадәр берөзлексез басылып тора.

Кыска гына вакыт эчендә «Бердәмлек» газетасы өлкәбездә яшәүче татар халкы арасында зур абруй казанып, аның бер санының тиражы 7-7,5 мең данәгә җиткән чаклары бар иде. Милли газетаның коллективын экономик тетрәнүләр дә сындыра алмады. Бернигә дә – акча кытлыгына, күп авылларда татар мәктәпләренең ябылуына да карамастан, «Бердәмлек»нең тотрыклы тиражы елдан-ел кимемичә, сакланып килә. Хәзер аны өйләренә 4 меңгә якын укучыбыз яздырып, даими укып бара.

Газета битләрендә татар халкының үткәне, бай тарихы, хәзерге татарларның тормышы киң яктыртыла. Соңгы вакытларда аеруча мәгариф, халыкка медицина хезмәте күрсәтү, татар авылларында туган телебезне, мәдәниятебезне, динебезне саклап калу кебек мәсьәләләргә аеруча зур игътибар бирелә. Татар халкының милли бәйрәмнәре, йолалары, гореф-гадәтләре, яшьләрне тәрбияләү, соңгы елларда киң таралу алган тәмәке тарту, аракы эчү, наркотиклар куллану кебек начар гадәтләр белән көрәш алып бару турында күп кенә кызыклы язмалар һәм күләмле мәкаләләр дөнья күрде.

Шулай ук яшьләрдә «Мәхәббәт күпере», «Яшьлек», яшь гаиләләрдә «Гаилә учагы» кебек сәхифәләр зур кызыксыну уяталар.

Ислам дине белән кызыксынучылар, Коръән сүрәләрен, аларның тәфсирен ныклап белергә, намаз укырга өйрәнергә теләүчеләр, гомумән, дин кардәшләребез өчен ай саен «Кыйбла» дини кушымтасы чыгып килә. Биредә бөтен мөселман гореф-гадәтләре һәм йолалар турында языла, Коръән сүрәләре, аларның татар теленә тәрҗемәсе, догалар һәм вәгазьләр басыла.

Балалар өчен шулай ук «Балалар почмагы» дигән сәхифә бар. Анда балалар татар язучыларының һәм шагыйрьләренең кыска хикәяләре, шигырьләре, татар халык әкиятләре белән танышалар, ребуслар һәм табышмаклар чишәләр, үзләре һәм яшәгән урынары турында да мәкаләләр язалар.

Газетаның беренче битендә һәрвакыт дөньяда, илебездә, өлкәбездә, Татарстан һәм башка төбәкләрдә, шәһәрләрдә, авылларда булган атналык вакыйгаларга кыскача күзәтү басыла. Шулай ук газета битләрендә укучылар хатларына да зур урын бирелә.

Кыскасы, «Бердәмлек» газетасы бар, аны беләләр һәм ул кешеләргә кирәк. «Бердәмлек» газетасы – Татарстан Республикасында «Бәллүр каләм» бәйгесендә җиңү яулаган милли басмаларның берсе.

Үткән елда Татарстан Президенты указы буенча «Бердәмлек»нең алмашсыз баш мөһәррире Рәфгать Нәбиулла улы Әһлиуллинга «Татарстанның атказанган мәдәният хезмәткәре» дигән мактаулы исем бирелде.

P.S. «Бердәмлек» газетасының координатлары:

443009, Самара шәһәре, Воронежская ур., 9 йорт

Тел.: (8-846)995-16-67; 995-16-89; 995-35-78; 997-15-83;

Факс:(8-846)995-16-67; 997-15-84.

E-mail: berdem@bk.ru