"Миңнехановка багышлаган җырны туктатырга бераз куркыныч" - TMTV кастингыннан иң кызыклы ВИДЕОмизгелләр

Үз көчләрен сынап карарга дип кеше бөтен Татарстаннан һәм, хәтта, күрше төбәкләрдән дә килгән иде. Катнашучылар географиясе бик киң: Оренбург, Башкортстан, Тольятти, Пермь, Ижау, Уфа, Иске Кулаткы, Баулы, Яшел Үзән, Чаллы, Кукмара, Аксубай, Азнкай, Әлмәт, Болгар һ.б. һ.б. Катнашучылар күбрәк халык җырларын башкарырга тырышты. Тавыш мөмкинлекләре болай гына аңлашылмаса, эстрада җырын да башкарып карарга сорады жюри әгъзалары.  Яшьләр күбрәк үзләре тыңлаган җырчыларның репертуарына мөкиббән. Әйтик, бер егет "хәзер мин сезгә Рөстәм Асаев репертуарыннан бер җыр башкарып китәм" дип "Син гомер агышларым"ны сузды. Катнашучылар арасында тамада булып көн күрүчеләр дә шактый иде. Алар, әйтерсең, банкетта чыгыш ясый, залны "күтәрмәкче" була, "йәгез, шул хөрмәткә күтәрик берне!" дип кычкырырлар сыман. Тамада булып чыныккан җырчыларның шаярырга авырыксынмыйлар. Берсе үзенең җырын болай дип тәкъдим итте: "Рәхим итеп тыңлагыз, Рөстәм Сәйфетдияров акчасына язылган җыр – башкара Руслан Сәйфетдияров".

 

Бер егет Рөстәм Миңнехановны 60 яшьлек юбилее белән котлау җырын башкарды. "Бу җырны туктатырга да куркыныч", - диде жюри әгъзасы Айрат Ильясов. Әлеге кызыклы мизгелнең видеосын шушы язма астында карагыз.

 

Казан музыка көллиятендә укучылар да, Фәрит Бикчәнтәевныкылар да, Айдар Фәйзрахмановныкылар да бар иде сайлап алуда. Профессиональ артистлар белән беррәттән үзләрен "мин теге ни... җырламакчы идем инде... мин прастуй авыл малае инде" дип тәкъдим итүчеләр дә булды. Жюри әгъзалары үзара нидер сөйләште, кәгазьләренә нидер теркәп барды. "Матбугат.ру" хәбәрчесе бер язуны гына күреп калды. "У костра" дигән иде кәгазьдә. "Учак янында гына җырлап утыру" дәрәҗәсе дип аңладык. Дөрес, кастингта "не у костра" җырларлык чын талантлар да бар иде. Әмма күп түгел. Талантлар беркайчан күп булмый. 

 

Кастингның иң кызыклы мизгелләрен карагыз:

 

 

 

 

 

 

Һәм бераз фото: