КИЛЕШҮ (ПЕЧӘН АЛЫП КАЙТУ ТУРЫНДА)

Шәрипова Фаягөл Әхтәм кызы (алга таба – Фая түти) бер яктан һәм Идрисов Харис Гыйләҗетдин улы (алга таба – Бүре Харисы) икенче яктан түбәндәге шартларда килешү төзеделәр.

1. КИЛЕШҮНЕҢ ПРЕДМЕТЫ

Бүре Харисы Фая түтигә печәнен алып кайтырга булыша.

1.1 Печән капка төбенә бушатылу белән алып кайтылган санала.

1.2. Печәнне лапаска кертү ихтыяҗы туган очракта яңа килешү төзү мәҗбүри.

2. ЯКЛАРНЫҢ БУРЫЧЛАРЫ

Фая түти:

2.1 Печәнне алып кайткан өчен Бүре Харисына сыек валюта белән түләргә тиеш.

2.2 Бүре Харисының хатыны Бибисара алдында әлеге килешүнең 2.1 пункты үтәлеше турында конфидинциальлек сакларга тиеш.

Бүре Харисы:

2.3 Печәнне алып кайтканчы ук сыек валютаны кулланмаган булырга тиеш.

2.4 Сыек валютаны куллангач, хатыны Бибисара алдында 2.1 пункт буенча конфидинциальлек сакларга тиеш.

3. ЯКЛАРНЫҢ ХОКУКЛАРЫ

3.1 Печәнне Габдри Илгизе яки Кылый Мирза арзанракка алып кайтырга ризалашса, Фая түти аларга мөрәҗәгать итә ала.

3.2 Күрше Мәдинә әби печәнен кыйммәтрәккә алып кайтырга сораса, Бүре Харисына шул заказга күчү рөхсәт ителә.

3.3. Әлеге килешү ике якның теләге буенча яки Бибисара теләге буенча таркалырга мөмкин.

4. ФОРС-МАЖОР

Ике як ихтыярыннан да бәйле булмаган, каршы тора алмаслык табигый көчләр килешүнең үтәлешен үзгәртергә мөмкин. Мондый көчләргә түбәндәгеләр керә: янгын чыгу, җир тетрәү, тайфун, су басу һәм Бибисараның кинәт килеп чыгуы.