Римма Никитина: “Әбиләр фикерен тыңлап, җыр өлкәсендә алга китеп булмый” (Римма Никитина һәм Ильяс Киньягулов белән интервью)

Ильяс: “Аксу” продюссерлык үзәгендә күп артистлар белән эшләргә туры килде, Римма белән дә шунда тыныштык. Үз эшләре буенча килгән Римма: “Син дә аранжировкалар эшлисеңме әллә?” – дигән сорау белән мөрәҗәгать иткәч, танышып киттек. Беренче тапкыр “Инстаграмнан эзлим сине” җырына аранжировка ясадык, Риммага бик ошады, шуннан бер-беребезнең иҗаты белән якыннан таныштык.

Римма: “Көтәм сине” җыры Ильяс белән беренче уртак иҗат җимешебез булды, соңгы дуэт булмас, чөнки русча җыр да яздырырга йөрибез. Ул бик күпләргә ошады, хәтта Башкорт телевидениясе дә җырның башкорт телендәге версиясен чыгарырга сорап шалтраткан. Хәзер менә башкортча җырларга өйрәнәм.

Ильяс: Көй авторы Радик Юльякшин белән без элеккеге дуслар, аннан кала якташлар да әле. Башкортстанда безнең авыллар арасы бары 5 чакрым гына. Без бергә аның белән башкорт эстрадасында күп еллар җырладык, шул мәлне якыннан танышып, дуслашып та киттек. Дөнья шулай кушкандыр, хәзер икебез дә Казанда яшәп, монда иҗат итәбез. Әле өч ай элек кенә безнең туганнар икәнне дә ачыкладык, шундый абыем булганга горурланам. Радикның җырлары белән кызыксынып торам һәм иҗатын бик хөрмәт итәм.

Римма: Радик Юльякшин иҗатын шулай ук бик хөрмәт итәм, аның үз стиле, киенү үзенчәлекләре бар, җырлары да аерылып тора. Интернетта язучылар Радик белән дуэт эшләүне сорыйлар, бәлки, киләчәктә булыр да. Радикның  үзенә җыр ошаган дип беләм, Ильяс шулай диде. Сүзләрен биш минутта иҗат иттем, чөнки бер егеткә дулап йөргән вакытым иде.

Ильяс: Клип турында фикерләребез бар, әлбәттә, бәлки  киләчәктә төшереп тә куярбыз.

Ильяс: Мин Буа сатира һәм юмор театрында 18 яшемдә эшли башладым. Тормыш мәктәбен шунда үттем дисәм була. Әлеге театрда эшләп, зур күләмдә тәҗрибә туплавыма бик шат. Спектакльдәге рольләр, сериалларда, “Елмай” юмор проектында катнашулар белән истә калды ул еллар. Мондый мөмкинлекләрне ачкан өчен аерым рәхмәтләрем Садриев Раил Илдар улына.

Ильяс: Бүгенге көндә мин, җырчы буларак, “Аксу” продюссерлык үзәгендә эшлим. Аранжировкалар – минем хобби. Музыка өлкәсендә төрле юнәлештә эшләргә яратам, билгеле булганча, җырлар да язам.

Ильяс: Рус җырларын да иҗат итәм, чөнки минем өчен бу яңа үсеш баскычы. Җырчылар төрле телдәге җырлар белән үзләрен сынап карарга тиеш.

Ильяс: 2014 елда мин «Татар моңы» яшь башкаручылар телевизион конкурсында 2 урынга лаек булдым. Халык җырларын бик яратып жырлыйм, башкорт халкының озын көйләре дә күңелгә бик якын.

Ильяс: Киләчәккә максатларым бик күп, барысын да сөйләп бетереп булмый, ләкин иң мөһиме – иҗатым белән  башкорт һәм татар милләтен күтәрәсем, мәдәниятләрен үстерүгә үз өлешемне кертәсем килә.

Римма: Минем сәхнәдәге образым тормыштан алынган. Мин һәрвакыт үз алдыма куелган максатларыма ирешергә тырышам һәм ирешәм дә. Сәхнәдә чакта тамашачы күңелендә истә калам икән, бу инде зур үсеш дип саныйм. Безнең татар эстрадасына кыюлык җитми. Күпчелек клиплар авылда, чәчкәләр тотып, агачлар янында төшерелә. Яңалык, кыю адымнар юк бу өлкәдә. Әбиләр аңламас дип, корсак селкетеп биегәнне дә кисеп калдыралар, янәсе, телевидение кануннарына туры килми. Шортик киеп җырлаганда да кырын карарга мөмкиннәр, чөнки барысы да сәхнәдә башкаручыларның матур татар халык җырларын озын күлмәк киеп җырлау үрнәгенә ияләшкән. Дөрес, һәркемнең үз иҗади юлы, ләкин башка тарафка да игътибар итәргә кирәк. Үземнең сайлаган юнәлешем буенча алга таба барам, җырлыйм, биим, иҗат итәм. Татар эстрадасына ауропа стилен кертәсем килә. Мин, гомумән, чит ил җырчыларына мөкиббән китәм. Ни өчендер көнбатышта кыска итәк киюне, сикереп биюне аңлыйлар, ә бездә “ярымшәрә чыгып, сикереп бии, оятсыз!” дигән караш ташлыйлар. Сәнгать өлкәсендә сайлау булырга тиеш. Яңа GongTV каналы ачылу да бик кирәк иде, шуңа да аның яшьләр форматында булуы бик ошый. Җитәкчесе Айдар Шәймәрданов яңа караш белән эш итә.

Римма: Чыннан да, күп җырларымның көен дә, сүзләрен дә үзем язам. Җырларны бик авыр яисә, киресенчә, бик шатланып йөргән чагымда гына яза алам. Тыныч халәттә иҗат итә алмыйм. Күп жырлар әтине югалткач язылды. Аерып әйтерлек авторларны атый алмыйм, тик соңгы вакытта Хәмид абый Мәткәримов белән эшләргә туры килде. Ул – шәп җырлар язучы искиткеч кеше. Аның белән хезмәттәшлек итүе бик рәхәт, шуңа үзен бик хөрмәт итәм.  Аның “Яратам” һәм “Караса бу күзләр” исемле җырларын башкарам.

Римма: “Инстаграмнан эзлим сине” – кызыктан гына язылган җыр. Ирек абый Габдрахманов сүзләрен җибәргәч, шаярып-көлеп танышып чыктым, аннары үземчә үзгәртеп бетердем. Ирек абый, тыңлагач, шаккатты, хит булачагына ышаныч белдерде. Дөресен әйткәндә, мин ул җырны популярлашып китәр дип уйламаган идем, тыңлаучылар бу җырга клип сорап хат яза. Бәлки, тәвәкәлләрмен дә әле. Бу арада, яңа идеяларны чынга ашырырга теләп, башка җырыма клип төшерү белән мәшгүль.

Римма:  «Манзара» музыкаль премиясен быел алдым, киләсе елга да лаек булырмын дип ышанып калам. Алай премияләр артыннар кумыйм, хәзер аларны күпләр ала бит. Ул матур сыннар гына тормышны үзгәртә дип уйламыйм.

Римма: «Я отпускаю тебя» дип аталган яңа русча җыр яздырдым. Әлегә бу төп яңалык , чөнки мин татарча иҗат итәм, ә русча җыр язу эксперименты беренче тапкыр. Җырның көен дә, сүзләрен дә үзем яздым, шуңа ничек килеп чыгуы үземә дә кызык.

 

 

 

 

 

Фотолар шәхси архивтан алынды.