Фисинджан - иранча тавык пешерү рецепты (ФОТО)

Иранда пешерелә торган тавык. Тел йотарлык тәмле! Кунакларыгыз таң калачак – менә күрерсез!
Бу ризыкның сере – гранат һәм чикләвектән ясалган соуста – анысын кунакларга әйтмәгез!
Кирәк:

тавык – 700 г;
башлы суган – 2 данә (уртача зурлыкта);
гранат – 250 г;
әстерхан чикләвеге – 30 г;
су – 100 мл;
эре тоз – 1/2 чәй кашыгы;
уылган кара борыч – 1/4 чәй кашыгы;
зәйтүн мае.

Эш барышы:

Тавыкны зур булмаган кисәкләргә бүләбез. Тавык өстен тоз, кара борыч белән ышкыйбыз.

Табаны, зәйтүн мае салып, җылытабыз һәм шунда тавык кисәкләрен кыздырып алабыз.

Хәзер тавыкны зур булмаган казанга күчерик. Ә табага тавыктан калган майда туралган суганны кыздырабыз да, аны тавык өстенә салабыз.

Соус әзерлибез:
Гранат төшләрен тирән савытка салып, изәбез – согын чыгарабыз һәм агарып калган төшләрдән арындырабыз.

Әстерхан чикләвегенә чират килде. Блендерда уабыз (әзләп су өстибез). Идеалда чикләвек ак эмульсиягә әверелергә тиеш. Шуны гранат суы булән катнаштырабыз.

Катнашманы тавык өстенә агызабыз, болгатып, утка куябыз һәм кайнатып чыгарабыз.

Кайнап чыгуга, утны әкренгә куеп, капкач белән каплыйбыз. Бер сәгать шулай әкрен утта кайнап торсын.
 
Бу тавыкка озынча дөге тәкъдим ителә:
Дөгене юып, тоз салынган кайнар суда 20 минут тотабыз. Аннары башка кастрюльда су кайнатып алабыз да, аңа тоз сибәбез. Шунда дөгене 9 минут пешерәбез. Өстенә сөлге бөркибез һәм капкач белән ябабыз.

5 минутка иң әкрен утта калдырабыз. Утны сүндереп, тагын 5 минут тотабыз.

Өстәлгә гранат төшләре сибеп бирәбез.