Гакыйльгә чәчәкләр китерегез!

29 июльдә иртәнге сәгать 11дә Кошки районының Иске Җүрәй (Старое Фейзуллово) авылында ике ел элек вафат булган шагыйрь һәм рәссам Гакыйль Сәгыйровның кабере өстенә истәлек ташы кую чарасы уздырыла.

Гакыйль Сәгыйров, 16 яшендә умыртка баганасына операция ясатканнан соң, кулсыз-аяксыз инвалид булып кала. Тик башы гына бераз борыла аның. Башка кеше булса, төшенкелеккә бирелеп, ашап-эчеп тик ятар иде. Ә Гакыйль читтән торып институт тәмамлый, авызына каләм кабып язарга, рәсем ясарга өйрәнә. Аның шигырьләре күзеңә яшьләр килеп еларлык та, көләрлек тә, тормыш асылына төшенерлек тә. Үз гомерендә Гакыйль Сәгыйров биш шигырьләр китабы бастырып чыгарды, дистәләгән рәсемнәр иҗат итте.

Гакыйль Сәгыйровның авыр тормыш юлы күпләргә үрнәк булырлык. Аның талантына, тормыш сөючәнлегенә, батырлыгына сокланып, Татарстан, Самара һәм Ульян өлкәләрендә 1998 ел Сагыйров елы дип игълан ителде, Самара Сабан туенда аны ел татары итеп сайладылар. Гакыйль Сәгыйров - Татарстанның Гаяз Исхакый премиясе, Самара өлкәсенең “Благородство” акциясе лауреты.

Шагыйрьнең каберенә таш кую чарасына бик күп мәртәбәле кунак¬ларның килүе көтелә: Татарстанның һәм Самара өлкәсенең мәдәният министрлыклары, Бөтендөнья татар конгрессы вәкилләре, дин әһелләре, татар иҗтимагый оешмалары әгъзалары, татарлар күмәкләшеп яшәгән район башлыклары, телевидение һәм газеталар журналистлары истәлекле таш кына куеп калмаслар, Гакыйль Сәгыйровның өен сипләп, анда музей ачу чараларын башлап җибәрү турында сөйләшерләр, дип көтелә.

Кем Гакыйль Сәгыйровны яхшы белә, якын күрә, зурларга тели - чарага рәхим итегез. Бу кеше ихтирамга, һичшиксез, лаек.

Гакыйль Сәгыйровка истәлек ташы кую комитеты.