Әлмәт театрында Туфан Миңнуллинның юбилей кичәсе узды

Әлмәт татар дәүләт драма театры Кама аръягы театрларыннан беренчеләрдән булып Туфан Миңнуллинның юбилей кичәсен үткәрде. Аларның бу беренчелек өчен хаклары да бар: театр драматургнын 13 әсәрен Әлмәт сәхнәсенә күтәргән. Коллективның горурлыгы Туфан Миңнуллинның «Ай булмаса, йолдыз бар» спектакле. Әлеге спектакль өчен 1979 нчы елда драматург үзе, режиссер Гали Хөсәенов һәм актриса Дамирә Кузаева Тукай бүләгенә лаек булган.

Кичә Туфан Миңнуллин әсәре буенча куелган спектакльләрдән өзекләр һәм котлаулар белән үрелеп барды. Бер-бер артлы сәхнәгә Әлмәт шәһәре башкарма комитеты җитәкчесе Мәҗит Салихов, драматургның каләмдәшләре Разил Вәлиев, Илфак Ибраһимов, Данил Салихов, Фоат Садриевлар чыкты. Алар Туфан абый Миңнулинның «вакыт сынавы узган драматург, халык гаме белән борчылучы, милләтне кайгыртучы иң фидакарь депутат булуы, күпләргә билгеле булмаган сыйфатлары, игелекле гамәлләре, үзенчәлекле гадәтләре турында сөйләде. Драматург иҗатына мөкиббән, шәхес буларак хөрмәт итүче тамашачылар да сүзсез калмады.

Кичәнең үзенчәлеге шул – тамашачы мәртәбәле шәхескә кызыксындырган сорауларын ирештерә һәм шул ук минутта эчкерсез, күпвакыт аңа хас юморлы җавапларын ишетә алды.

1

2