27.12.2019 Мәдәният

Казанда Татарстан Дәүләт җыр һәм бию ансамбле үзенең иң яхшы номерларын тәкъдим итте (ФОТОрепортаж)

Казанда Татарстан Дәүләт җыр һәм бию ансамбленең концертлары зур уңыш белән узды. Легендар коллектив 22 һәм 23 декабрьдә «Сәйдәш» мәдәният үзәгендә үзенең иң яхшы номерларын тәкъдим итте. Ансамбльнең капиталь ремонттан соң рәсми рәвештә ачылган яңартылган бинада беренче булып чыгыш ясады.

«Быел без яңартылган «Сәйдәш» үзәгендә чыгыш ясарга булдык, халыкның барлык катламнары да безнең концертны тамаша кыла алсын өчен, билетларны махсус арзанрак бәядән иттек», - дип хәбәр итте сценарий авторы һәм режиссеры – ТР Дәүләт җыр һәм бию ансамбленең сәнгать җитәкчесе, ТР халык артисты Айрат Хәмитов.

Казанда Дәүләт җыр һәм бию ансамбленең соло концертларына билетлар чыгыш ясаганчы ук сатып беткән иде. Ул аншлаг белән узды. Матур тамашаны күрергә теләүчеләр өчен өстәмә урындыклар куярга туры килде хәтта.

Концерт «Гармун» вокал-хореографик номеры белән ачылды. Аннары артистлар «Ай, былбылым», «Әллүки», «Көмеш беләзек», «Идел буенда», «Жомга», «Канатлы яшьлек» һ.б. номерлар башкарды.

Концертның икенче бүлеге «Мизгел» вокал-хореографик номерыннан башланды, аннары оркестр, бию, хореографик попурри һәм вокал-хореографик номерлар күрсәтелде.

«Казанда узган концертлар тамашачының безнең чыгышларны сагынуын һәм безне бик җылы кабул итүен күрсәтте. Без ансамбльнең алтын фондындагы татар җырлары һәм биюләрен башкарган иң яхшы номерларны да, киләсе елның язында чыгарылырга теләгән яңа программадан өзекне дә күрсәттек», - дип билгеләп үтте А.Хәмитов.

«Сәйдәш» мәдәни үзәгендә ансамбльнең соло концерты Татарстан артистларының талантлы чыгышларына сокланган тамашачыларның көчле алкышлары белән тәмамланды. Зал сигез дистә ел буе милли гореф-гадәтләрне саклаучы, татар халкының музыкаль, бию мәдәниятен, гамәли сәнгатен иң югары профессиональ дәрәҗәдә тәкъдим итүче коллективны аягүрә басып алкышлады.

---
Матбугат.ру
№ --- | 27.12.2019