КФУ ректоры Илшат Гафуров: Татар телебезне сакларга кирəк

Иң элек Илшат Гафуров университетның уңышларына басым ясады һәм аерым сорауларга тукталды. Шулар арасында татар теле мәсьәләсе дә бар иде.

 

“Мәктәп өлкәсе турында сүз алып барганда, без ата-аналар арасында сораштыру үткәрдек. Алар барысы белән дә канәгать, дип әйтеп булмый. Ата-аналар төркемендә без үзебез төрле сорауларны күтәрдек. Мәсәлән, татар теле буенча белем бирү сорауларына да кагылдык. Беребез дә методикаларның хәзерге заманга туры килмәве хакында уйланмады. Барысы да җиңел түгел икәненә төшендек. Әмма барыбер тормыш безнең белем бирү программаларының дөрес юнәлештә барганын күрсәтте. Безнең миссиябез – методика өчен җаваплы булу. Татар телебезне сакларга кирəк”, — дип ассызыклады ул.

 

Илшат Гафуров сүзен йомгаклап:

 

“Без бик кызыклы вакытта яшибез. Миңа калса, әлеге очрашу мәйданы сезнең коллективта булган проблемаларны үзәккә салып сөйләшүне күздә тота. Әлеге очрашулар миңа үземнең эшләремә төзәтмә кертү мөмкинлеген бирә”, – дип тәмамлады.

 

Алга таба Л.Толстой исемендәге Филология һәм мәдәниятара багланышлар институты директоры Рәдиф Җамалетдинов институтның казанышлары һәм планнары турында сөйләде.

 

“2017 ел институт каршында куйган бурычларны гамәлгә ашыруда коллективның җитди эшчәнлеге нәтиҗәсе булды. Әйтик, Оксфорд сүзлеге нәшрияты Oxford Global Languages (OGL) – Оксфордның глобаль телләр проектына татар телен өстәде. Әлеге татар-инглиз һәм инглиз-татар онлайн-сүзлеген безнең институт хезмәткәрләре эшләде. Шулай итеп, татар теле OGLга кертелгән беренче төрки тел булды. Без беренчеләрдән булып Кембридж университетының “Глобаль телләр” халыкара төрки проектына кердек”, – дип әйтте ул.

 

Рәдиф Җамалетдинов татар теле буенча институт күләмендә тормышка ашырылачак план турында да әйтте.

 

“Бүгенге көндә татар телендә белем бирүне цифрлаштыру мөһим аспект булып тора. Татар телен алгы планга чыгару максатыннан, быел Филология һәм мәдәниятара багланышлар институты “Татар онлайн” дип исемләнгән яңа белем бирү порталын ачарга җыена. Ул татар теле буенча берничә интернет-ресурстан торачак һәм татар телен өйрәнергә, аны үстерергә, татар халкының мәдәниятен күтәрергә ярдәм итәчәк”, — диде институт директоры.