Камал театрына Россия Федерациясе Хөкүмәте премиясе тапшырылды

Кичә XVIII Халыкара Волков фестиваленең ачылу тантанасында Г.Камал исемендәге Татар дәүләт Академия театрына Россия Федерациясе Хөкүмәте премиясе тапшырылды. Премияне Ф.Волков исемендәге Россия дәүләт Академия театры сәхнәсендә Г.Камал театрының директоры Илфир Якуповка һәм Россиянең һәм Татарстанның халык артисты Ринат Таҗетдиновка тапшырдылар.

VI Халыкара "Туганлык" төрки телле театрлар фестиваленең лауреатлары кичә фестивальнең ябылу тантанасында билгеле булды.

Исегезгә төшерәбез, Уфада 7 - 14 сентябрь көннәрендә VI Халыкара "Туганлык" төрки телле театрлар фестивале узды. Атна дәвамында фестиваль жюриы һәм тәнкыйтьчеләр коллегиясе тугыз спектакль карап, үз бәясен бирде. Жюри рәисе – Рифкать Исрафилов иде.

VI Халыкара "Туганлык" төрки телле театрлар фестиваленең иң күп премияләре, аерым алганда, алты төп номинациянең өчесе һәм бер кызыксындыру номинациясе буенча премия, фестивальне гамәлгә куючыларның берсе булган М.Гафури исемендәге Башкорт драма театрына тапшырылды. Фестивальнең иң яхшы спектакле дип Камал театрының баш режиссеры Фәрит Бикчәнтәевнең М.Гафури исемендәге Башкорт дәүләт академия драма театрында куйган "Антигона" спектакле танылды. Әлеге спектакльдә Креон ролен башкарган Олег Ханов - «Иң яхшы ир-ат роле» номинациясендә, Лилия Галина, Антигона образы өчен, «Иң яхшы хатын-кыз роле» номинациясендә җиңеп чыкты. Әлеге спектакльдә Сакчы ролен башкарган Илдар Сәетовны жюри «Икенче пландагы ир-ат роле» номинациясендә җиңүче дип билгеләде.

Тагын ике төп номинациягә К.Иванов исемендәге Чуваш дәүләт академия театры һәм «Жастар» Казах театры лаек булды. “Күкеле сәгать” спектакле буенча «Иң яхшы сценография» номинациясендә Валерий Яковлев бүләкләнде. «Иң яхшы музыкаль бизәлеш» номинациясе буенча приз «Жастар» Казах театрының «Ревизор» спектакленә тапшырылды.