Еллар безгә бәла түгел

6 октябрь көнне Кызыл Октябрь районы Уразавылның шәфкать йортында "Нам года не беда" дигән чара узды. Аны мәдәни оештыручы Афия Каюмова оештырган, бүтән хезмәткәрләр дә якта калмаган, әлбәттә. Биредә хәзер төрле хәлдәге һем яшьтәге 39 кеше яши, һәрберсенең монда эләгүенең фаҗигале тарихы бардыр.

Язмышлары җиңел булмаган, гомер көзләрен гаилә, якыннары кадер-хөрмәтендә түгел, ә хөкүмәт йортында уздырырга мәҗбүр булган әби-бабайларның бертөрле тормышларына бераз гына ямь өстәр өчен барча хезмәткәрләр бар тырышлыкларын куеп эшлиләр, мәдәни чаралар да шул максаттан уздырыла. "Еллар безгә бәла түгел" дигән мәдәни чара бераз конкурс формасында оештырылган иде. Иң башта шәфкать йорты директоры Ринат Каюмов барысын да өлкәннәр декадасы белән котлап, катнашучыларга уңышлар теләде. Чарада биредә яшәүче сигез кеше катнашты һәм алар кешенең дөньяга килүеннән башлап, картайганчыга кадәр тормышын сәхнәләштереп күрсәтергә тырыштылар.

Хания Магҗанова белән Зинаида Сорокина баланың нәни чагын, елаганда аны ничек тынычландырырга кирәк икәнне күрсәттеләр. Менә бала үсә, мәктәпкә бара. Аның бу чорын Хамсәнә Хөсәинова белән Галина Закуражнова бик оста тасвирладылар, кызыклы гына күренеш килеп чыкты.

Мәктәпне тәмамлагач, матур яшьлек чоры башлана - гашыйк булулар, очрашулар... Нәкъ менә шушы чорны - очраша башлаулар¬дан алып, өйләнешкәнче, бала туганчыга кадәр Мөфия Алеева белән Рушан Жамалетдинов кызыклы итеп күрсәттеләр. Владимир Коробков белән Таисия Шкунова парлы булып картаюны, олыгайгач, бик тә бер-береңә кирәк булуны исбатладылар үз чыгышларында. Кыскасы, барысы да үз рольләрен яхшы уйнадылар һәм Ринат әфәнде, Афия ханым, кадрлар буенча белгеч Гүзәл Харрясовадан торган жюри дуслык җиңде дигән нәтиҗәгә килде.