26.04.2016 Җәмгыять

Бүген Габдулла Тукайның тууына 130 ел тулу билгеләп үтелә (ЧАРАЛАР ПРОГРАММАСЫ)

Бүген татар халкының бөек улы – татар әдәбияты классигы, әдәби тәнкыйтьче, публицист, яңа заман татар әдәбиятына һәм әдәби теленә нигез салучы Габдулла Тукайның (1886-1913) тууына 130 ел тулды. Бу көннәрдә шул уңайдан милләттәшләр яшәгән бик күп төбәкләрдә бөек шагыйрьгә багышланган чаралар үткәрелә.

Казанда бүген сәгать 9даТукай скверында Габдулла Тукай һәйкәленә республика һәм муниципаль җитәкчелек, җәмәгатьчелек катнашында чәчәкләр китерү тантанасы була.

Тагын 1 сәгатьтән Островский ур., 10 адресы буенча урнашкан Яшь тамашачы театры бинасына Г.Тукайга мемориаль такта беркетү тантанасы үткәрелә, анда республика парламенты, хөкүмәте вәкилләре дә катнашуы билгеле. Бу бинада элек Шәрык клубы булган. Шагыйрь үзенең “Печән базары, яхуд Яңа Кисекбаш” поэмасын беренче тапкыр биредә укыган...

Сәгать 11дә исә М.Җәлил исемендәге Татар дәүләт опера һәм балет академия театры янындагы Тукай һәйкәле янында традицион Шигърият бәйрәме башлана.

Көннең икенче яртысында, сәгать 2дә, әлеге театрда республика җитәкчелеге катнашында Туган тел көненә һәм Габдулла Тукайның тууына 130 ел тулуга багышланган гаять зур тантаналы чара була.

Татарстан Республикасының Г.Тукай исемендәге Дәүләт премиясенә лаек яңа лауреатлар да бүген игълан ителәчәк.

Сәгать 3тән 4кә кадәр Казан халкы һәм башкала кунаклары “Кырлай” паркында шәһәрнең иҗат төркемнәре катнашында концерт карый алачак. Чарада шулай ук гомуми белем бирү мәктәпләрендә узган шигырь сөйләүчеләр бәйгесендә җиңүчеләр катнаша.

Сәгать 4тә Бауман урамында узачак “Мин татарча сөйләшәм!” дигән яшьләр чарасы, һәр елдагыча, бик күп кешене җыяр дип күзаллана.

Биредә шуны да билгеләп үтик: Казанда бу көннәрдә үткәрелгән IV Бөтендөнья татар хатын-кызлары форумына килгән делегатлар да, ә алар дөньяның 23 иленнән 500ләп гүзәл зат, Тукай хөрмәтенә уздырыласы чараларда катнашачак.

---
Татар-информ
№ --- | 26.04.2016