"Хәйдәр Бигичев ядкәре"ннән ФОТОрепортаж

Кичәдә ТР Дәүләт Советы Рәисе Фәрит Мөхәммәтшин, ТР Дәүләт Советының Мәгариф, мәдәният, фән һәм милли мәсьәләләр комитеты рәисе Разил Вәлиев, Хәйдәр Бигичевның сәхнәдәш дуслары, якташлары һәм аның иҗатын яратучылар катнашты.

 

Кичә Сара Садыйкованың Гөлшат Зәйнашева сүзләренә язылган “Идел суы ага торыр” дигән гаҗәеп матур, тирән моң белән сугарылган җыры белән башланып китте. Ул Хәйдәр Бигичев башкаруында язмада яңгырады...

 

Проектның продюсеры, Рәшит Ваһапов исемендәге татар җыры фестивале директоры Рифат Фәттахов тамашачыларны сәламләп, бүгенге кичәгә залны тутырып килгәннәре өчен рәхмәт белдерде. Ул татар җыр сәнгате тарихында Рәшит Ваһапов, Илһам Шакиров һәм Хәйдәр Бигичевтан гыйбарәт бөек өчлек булуына игътибарны юнәлтте.

 

“Алыштыргысыз кешеләр булмый, диләр. Татар җыр сәнгате белән яхшы таныш кеше буларак, шуны әйтә алам: андый кешеләр була. Татар халкы өчен Хәйдәр Бигичев – әнә шундый алыштыргысыз шәхес”, – диде Рифат Фәттахов, соңгы елларда әлеге бөек останың исеме әкренләп онытыла башлавына аянуын яшермичә. Аның фикеренчә, Хәйдәр Бигичевның иҗаты, югары профессиональ кимәлдәге вокал мирасы яшьләребез өчен менә дигән осталык мәктәбе, өстәл китабы, дәреслек ролен үти ала. Мондый бөек шәхесләрне онытырга хакыбыз юк, дип ассызыклады проектның продюсеры.

 

ТР Дәүләт Советы Рәисе Фәрит Мөхәммәтшин Рәшит Ваһапов исемендәге татар җыры фестиваленең 12нче сезоны ачылуын искәртеп, шушы вакыт эчендә аның татар моңын яратучыларны милләтәшләребез яшәгән 11 илдә, Россиянең 51 төбәгендә җыюын, аның киңкүләмлеген ассызыклап үтте. Ул заман яшьләренең Хәйдәр Бигичев башкарган җырларны күтәреп алуын билгеләп, Рәшит Ваһапов фестиваленең бу эштә өлеше зур булуына игътибарны юнәлтте.

 

“Хәйдәр Бигичев турында бик күпләр үз фикерен әйтә ала: аны беләләләр, аның белән аралашалар, дуслашалар иде. Безгә исә аерым бәхет тәтеде: без Хәйдәр һәм аның гаиләсе белән бер йортта яшәдек. Без аның белән очраша, күрешә, аралаша идек. Һәрвакыт Хәйдәрнең моңына, тормышта үз-үзен тотышына сокланып яшәдек, – дип хатирәләре белән уртаклашты республика парламенты башлыгы. Аның фикеренчә, Хәйдәр Бигичев кебек җырчылар халык хәтеренә мәңгелеккә кереп кала. – Ул йөрәккә үтми торган җырларны башкармый иде. Күңелгә моң сала, уйлата торган җырлар җырлап, Хәйдәр халкыбызны Россиядә генә түгел, бөтен дөньяга танытты. Бүген Хәйдәр Бигичев кебек олпат шәхесләребез – чын татар егетләре, татар интеллигенциясе вәкилләренең арабызда әллә ни булмавы бик кызганыч. Әмма бүгенгедәй кичәләр, концертлар очрашулар бездән киткән кешеләрне истә тотарга мөмкинлек бирә. Без аны хәтерлибез, аның рухы белән яшибез икән, димәк, ул әле исән!”

 

Чарада Хәйдәр Бигичев турындагы җылы хатирәләре белән шулай ук җырчының сәхнәдәш дуслары – Клара Хәйретдинова, Мөнир Якупов, Рафаэль Сәхабиев уртаклашты.

 

Кичәдә мәшһүр артистның якташлары – Түбән Новгород өлкәсеннән килгән милләтәшләребез дә катнашып чыгыш ясады. Түбән Новгород өлкәсе Кызыл Октябрь районы башлыгы Халит Сөләйманов бөек якташларының исемнәрен кадерләп саклаучы Татарстан халкына, республика җитәкчелегенә рәхмәт белдерде. Түбән Новгород өлкәсе татарлары конгрессы рәисе Гаяр Хәсәнов, аерым алганда, казанлыларга, татарстанлыларга Түбән Новгород татарларларының кайнар сәламен җиткереп, өлкәнең милләтебезгә Рәшит Ваһапов, Хәйдәр Бигичев кебек мәшһүр улларын (алар күрше генә булган авылларда туган) биргән Кызыл Октябрь районында бу ике шәхескә һәйкәл куелачагын билгеләп узды. Ул бу һәйкәлне киләсе елның беренче яртысына – Түбән Новгородта уздырылачак федераль Сабан туена өлгертү зарурияте турында әйтте.

 

Әдәби-музыкаль кичәдә нигездә Хәйдәр Бигичев репертуарыннан романслар, арияләр, җырлар, халык көйләре, шулай ук татар-башкорт эстрадасының иң матур үрнәкләре яңгырады. Аларны Илһам Вәлиев, Фәдис Ганиев, Раяз Фасыйхов, Сиринә Зәйнетдинова, Гөлсирин Абдуллина, Айгөл Хисмәтуллина, Рифат Шәрәфетдинов, Гүзәл Җиһаншина, Фердинанд Сәләхов, Илүсә Хуҗина, Руслан Сәйфетдинов, Рөстәм Асаев, Венера Ганиева, Марсель Вагыйзов, Рәнис Габбазов, Азат Абитов һ.б. җырчылар башкарды, шулай ук Рәсим Ильясов җитәкчелегендә “Казан нуры” халык музыка уен кораллары оркестры һәм Анна Гулишамбарова җитәкчелегендәге “Новая музыка” камера оркестры, Рамил Курамшин, Ринат Вәлиев һ.б. музыкантлар, бигрәк тә җырчының хатыны Зөһрә Сәхабиева һәм сеңлесе Халидә Бигичева чыгыш ясап, кичәне онытылмаслык итте, дип хәбәр итә "Татар-информ" агентлыгы.