Түбән Новгородта 25 нче юбилейлы сабантуй узды

Ул, елдагыча, татар бистәсе дип саналган Канавин районының 1 Май исемендәге ял паркында узды. Сабантуй көне матур һәм кояшлы булды, шуңа күрә һәркем рәхәтләнеп ял итте. Түбәтәйлар, яулыклар, хәтем-догалар, бүтән мөселман атрибутикасы тәкъдим иткән сату нокталары тирәсеннән халык бер өзелмәде.

Тантаналы ачуда барча халыкны милли бәйрәм белән Түбән Новгород шәһәре администрациясе башлыгы Олег Кондрашов, эчке эшләр сәясәте министры Анатолий Мигунов, өлкә Законнар чыгару җыены депутаты Николай Шкилев, Татарстанның Балык Бистәсе районы администрациясе башлыгы Илһам Валеев, шулай ук Канавин районы администрациясе башлыгы Дмитрий Шуров һәм өлкә Диния нәзарәте рәисе Гаяз хәзрәт Закиров җылы котладылар. Барлык чыгыш ясаучылар бу бәйрәмнең милләтләр дуслыгы бәйрәме икәнен, татар халкының эшчән, тырыш, бердәм булуын билгеләп үттеләр. Тантаналы өлештән соң барча кунаклар Татарстан Республикасы һәм региональ милли-мәдәни автономиясе чатырларында булып, милли ашлар белән сыйлана алды.

Бәйрәмнең икенче өлеше булып дәвам иткән концерт программасы да искиткеч матур һәм бай булды. Балык Бистәсе районы һәмТүбән Новгород өлкәсенең Спас районы үзешчәннәре, “Мирас” ансамбле, Мәскәү артистлары DJ Марат Сунтяров, Зөлфия Хабибуллаева һәм башкаларның чыгышын тамашачы зур игътибар белән карады, тыңлады, кайнар алкышларга күмде.

Паркның икенче ягында региональ автономиянең яшьләр хәрәкәте активистлары балачагалар өчен милли уеннар байтак оештырдылар. Аларда катнашып һәркем күңелен күтәрде, ә ахырда истәлекле бүләк белән бүләкләнде.

Билгеле, сабантуйның төп бизәге булган билбаулар белән милли көрәш мәрәсе тирәсендә иң күп халык бөтерелде. Нәтиҗәдә, Түбән Новгородның юбилейлы сабантуй батыры исеменә сафаҗайлы Илшат Нуриманов лаек булды.

Безнең редакция быел да иң матур көрәш күрсәтүчегә бүләк әзерләгән иде. Аңа Ринат Сетдиков лаек булды , ә Спас районы бүләге Илдар Усмановка тапшырылды. Шуның өстенә редакция тарафыннан "Туган як" газетасы да таратылды. Билгеле, реклама максаты белән.

Нижний сабан туе кичкә тикле гөрләде. Музыкаль өлешне үз кулларына алган Мәскәү кунаклары DJ Радик, Айрат Сафин, Рената Ильясова һәм Сөмбел Билалова кебек яшь, талантлы җырчылар чыгышлары кемне дә битараф калдырмады. Сабантуйга килгән барча халык артистларга кушылып җырлады, биеде, күңел ачты. Киләсе очрашуларга кадәр дип, караңгы төштә генә таралышты халык.

1

2