ВӘЛИЕВА ЛЕНИЗА

Лениза Вәлиева Татарстанның Мөслим районы Симәк авылында туып үскән. Мәктәптә татар теле һәм әдәбияты укыта.

Әни сүзе

Галим – философның сүзеннән
Кадерлерәк, әни, киңәшең.
Биш балаңа һәрчак ягымлы сүз,
Йөрәк җылың бүләк итәсең.

Самавырың кайный өстәлеңдә,
Бәлешләрең тәмле, баланлы.
Тәмле сүзең белән сыйлый-сыйлый
Кунак итәсең һәр балаңны

Әни сүзе һәрчак кирәк икән,
Ярты гомер үтеп китсә дә.
Башкаларга белем бирә-бирә.
Чәчләрем агарып бетсә дә.

Ана күңеле

Әле кызын кысып кочаклап,
Әле сөеп уңган киявен.
Хәерле юл теләп озата ана
Бер кайтыр дип кайткан кунагын.

Алар өчен генә мунча яккан,
Себеркенең пешереп иң шәбен.
Токмач кискән, тәбикмәген изгән,
Берсен салган, берсен төшергән.

Алъяпкычка кулын сөртә-сөртә,
Кыстый-кыстый өсти ашларын,
Оныклары буйга узып киткән,
Һаман сыйпый үрелеп башларын.

Студент оныгына калдыра,
Пенсиясен бераз чеметеп.
Гомере буе яши әниләр
Үзен түгел, бала кайгыртып.

Капка төбен узып китте инде
Киявенең импорт машинасы.
Буш урамда калды ике ялгыз –
Әни белән капка баганасы.