КАМАЛ НАРИМАН

Нариман Камалов – җырчы шагыйрь. Аны тамашачылар шулай атап йөртә. Бүгенге җыр мәйданында Нариман Камалның үзенең урыны бар. Ул "Мәхәббәт чәе", "Җыр керсен күңелгә", "Азалия", "Карлы яңгыр", "Көнләшмә" кебек җырлары белән яхшы таныш. Нариман Камал күп еллар "Ватаным Татарстан" газетасында эшләде. Аның шигъри тәлгәшләреннән укучыларыбыз да "авыз итсен" әле.

Нариман Зариф улы Камалов 1942 елның 11 гыйнварында Татарстанның Кама Тамагы районы Кече Салтык авылында туган.

Беренче кар

Без... Без – сугыш елы балалары
Без... Без – сугыш елы балалары,
Ачы язмыш безне сынаган.
Тормыш авырлыгын без күтәреп,
Күпме сыгылсак та сынмаган.
Онытырга телим – мөмкин түгел,
Яралары калган йөрәктә.
Әл дә булса минем үткәннәрем
Төшләремә кереп йөдәтә.

...Ул чак кемгә – алты, кемгә– биш яшь,
Кайсыбызга дүрт тә тулмаган.
Яланаяк камылларга басып,
Башак җыйган... Җиңел булмаган.
Әллә кайдан килеп чыга "перчи":
"Кем кушты, ди, башак җыярга?
Башак җыйган өчен Себер... Сөрген!
Колымага кирәк куарга!"
Малай-шалай чаба, мин йөгерәм,
Ничек түзә ялан тәпиләр? –
Камыл яралаган аякларны
Күрә калса нишләр әниләр?
...Аякмы соң "вәжни"? Өйдә – кайгы.
Әни елый – манма күз яше.
Сулык-сулык үксеп елавыннан
Белмим ничек миңа түзәсе?
Юатмакчы булам: "Әни, – димен, –
Ник елыйсың? Тукта – елама.
Сабый булсам да мин сизәм, әни,
Авыр икәнлеген болай да..."
Ул дәшмәде. Мин барыбер аның
Яшьле күзләреннән аңладым.
...Күрәсеңдер, әни ...