ТАТАР ЖУРНАЛИСТЛАРЫНЫҢ ШЫПЫРТ БӘЙРӘМЕ
Бүген журналистлар, аеруча татар журналистлары бердәмме, дигән сорауга җавапны бөтен тулылыгы белән әйтә алам: юк! Бер-беребезне белмибез, кемнедер ниндидер түрә я булмаса газетаның, радио-телевидениенең хуҗасы эзәрлекләгәндә күрми дә калабыз. Белгән очракта, шул кирәк иде аңа дип, сөенүчеләр дә юк түгел арабызда. Хәер, чиле-пешле әйбер язып ятучы һәм шул “шедевр”лары белән хозурланып, түрәләргә яраклашып, хакимнәрнең чын ялчысына әйләнеп яшәүче журналистлар гамәле генәдер инде монысы. Андыйларны кыерсытмыйлар. Чөнки алар кирәк.
Менә узган шимбәдә оештырылган журналистларның рәсми булмаган очрашуы үзара танышу, дуслашу максатын куйды. Без бердәм булсак, куәтебез артачак кына бит. Кайсыдыр журналистны кыерсытсалар, ә нигә башкаларга да аны якларга ташланмаска...
Әле яңа гына эшли башлаган, татар матбугатына ниндидер ярыш стимулы кертеп җибәргән, иң кызыклы язмаларны үзенә сайлап бастыручы “matbugat.ru” интернет газетасы хуҗасы Данил Сәфәровның, татар журналистикасы көнен шундый рәсми булмаган шартта билгеләп үтәргә иде дигән теләген мин шундук элеп алдым һәм менә “matbugat.ru” сайтына эленгән белдерү буенча шимбә көнне үзбәк пылавы ашарга “Ош” кафесына 20ләп журналист җыелды. Бик күңелле булды бу очрашу. Рәхәтләнеп сөйләштек, киңәшләштек, әллә нинди зур-зур планнар кордык. Иң мөһиме – даими очрашып торырга булдык. Тиздән татар журналистлары җыелышып, табигатькә чыгарга җыенабыз.
Кыскасы, беренче коймак төерле була диләр, ә безнең бу коймагыбыз төерле булмады.
Илфат ФӘЙЗРАХМАНОВ
Безнең гәҗит
№ 20 | 23.05.2008