Шәхси зиратлар булдырылачак

Россиядә шәхси зиратлар барлыкка килүе ихтимал. Зиратта каберне карап торучылар булмаган очракта, шул ук урынга яңа мәет җирләнергә мөмкин. Бу турыда “Российская газета” хәбәр итә.

Зиратларда, мәрхүм­нәр­не соңгы юлга озату өлкә­сендә тәртип урнаштыру вәкаләте РФ Төзелеш, торак-коммуналь хуҗалык министрлыгына бирелде. Бел­гечләр фикеренчә, дәүләт бу өлкәне үз контроленә алса, кешеләрне соңгы юлга озатуга бәйле бизнесның “кара” ягы ачылачак. Бу өлкәдә кәсеп итүнең тулаем еллык кереме 70 млрд сум, аның яртысы – алдау-йолдау, хәрәм юл белән табылган акча.

Россиядә төгәл ничә зират барлыгы билгеле түгел, 35-70 мең тирәсе, диләр. Россия Хөкүмәте мәрхүм­нәрне күмү мәшәкатьләре белән кемнең шөгыльләнүен конкурс нигезендә билге­ләргә тәкъдим итә. Конкурста шәх­си ширкәт тә катнашырга мөмкин. Зиратларда электр уты cузылырга тиеш, зиратка илтә торган юллар, ка­бер­лекләр арасындагы сукмак­лар тәртиптә булырга, шулай ук сакчылар тарафыннан күзәтелергә тиеш. Чәчкә­ләр­не саталар икән, сәүдә закон нигезендә алып барылачак.

Белгечләр әйтүенчә, зур шәһәрләрдәге зиратларда урыннар аз булганлыктан, кабер каралмый яки анда кемнең җирләнгәне билгесез икән, ул җирне кабат куллану мөмкинлеге тудырылырга тиеш. Шулай ук алар, зиратларда тәртип урнашса, мәрхүмне соңгы юлга озатуга тотылган чыгымнар да бермә-бер кимеячәк, дигән фикердә. Исегезгә төше­рә­без: Казанда да зиратларда урын җитешмәү проблемасы бар. Татарстан Дәүләт Советы депутаты Разил Вәлиев сүзләренчә, мәшһүр кеше­ләрнең аерым зиратлары булырга тиеш.