17.01.2014 Икътисад
Сәгатьләп түләү яхшыракмы? Айлапмы? (Сораштыру)
ЛДПР партиясе депутатлары Россиядә хезмәт хакын сәгатьләп түли башларга кирәк дип саный. Күптән түгел алар Дәүләт Думасына әнә шундый эчтәлектәге яңа закон проекты тәкъдим иткән. Депутатлар фикеренчә, Россия халкы сәгатенә ким дигәндә 100 сум алып эшләргә тиеш. Яңа закон проекты үз көченә керә калса, минималь хезмәт хакы күләме 16–17 мең сумны тәшкил итәчәк.
Бу уңайдан Superjob.ru порталы уздырган сораштыру нәтиҗәләреннән күренгәнчә, Россия халкының 41 проценты хезмәт хакын сәгатьләп түли башлауга каршы, 32 проценты, киресенчә, бу яңалыкны хуплый. Ә сез хезмәт хакын сәгатьләп түли башлауга ризамы?
Елена Потапова, Татарстанның Хезмәт, эш белән тәэмин итү һәм социаль яклау министрлыгының хезмәт мөнәсәбәтләрен җайга салу бүлеге башлыгы:
– Шәхсән үзем закон проектын күрмәдем, ишетеп кенә беләм. Шуңа күрә аның нинди шартларны күздә тотуы турында фикер йөртүе кыен. Закон буенча минималь хезмәт хакы күләме яшәү минимумыннан азрак булырга тиеш түгел. Ләкин бездә әлегә моны җайга салырлык федераль закон юк. Шуңа күрә икесе арасында шактый аерма килеп чыга. Чагыштыру өчен: 2014 елның 1 гыйнварыннан башлап минималь хезмәт хакы 5 мең 554 сумны тәшкил итә. Татарстанда яшәү минимумы күләме – 6 мең 708 сум. Минималь хезмәт хакын (5 мең 554 сумны) ЛДПР тәкъдим иткән система буенча исәпләсәк, кеше сәгатенә 33-34 сум алып эшләргә тиеш була. Депутатлар тәкъдим иткән сумма өч мәртәбә артыграк. Әмма минималь хезмәт хакын арттыру хисабына эшләүчеләр башка гарантияләрдән колак кагарга, халыкның керем дәрәҗәсе кимергә мөмкин. Шуңа күрә нинди дә булса үзгәреш кертер алдыннан аның нинди нәтиҗәләргә китерәчәге турында уйларга кирәк.
Ринат Хәмидуллин, Баулы башкарма комитеты җитәкчесенең социаль мәсьәләләр буенча беренче урынбасары:
– Бюджет системасында эшләүчеләр өчен бу яхшы яңалык дип саныйм. Әйтик, безнең техник хезмәткәрләребез аена 8-9 мең сум хезмәт хакы алып эшли. Бу акча коммуналь хезмәтләр түләүгә түгел, ашарга да җитми. Бүген 16 мең сум хезмәт хакы алып эшләүче кеше бик сирәк. Шуңа күрә хезмәт хакын сәгатьләп түли башласалар, бик яхшы булыр иде. Ләкин сәгатенә ким дигәндә йөз сум исәбеннән хезмәт хакы түләнә башласа, дәүләт кайдан акча табып бетерер икән соң?
Айзат Шәймәрданов, “ТНВ” каналы журналисты:
– Үземә килгәндә закон проекты миңа берничек тә кагылмый. Бу очракта журналист өчен сәгатьләп түләүнең мәгънәсен дә күрмим. Материалның темасы һәм ни дәрәҗәдә эшләнгәненә карап хаклар каралырга тиеш. Шуңа да иҗат әһелләре өчен бу әллә ни әһәмиятле закон өлгесе түгел. Безне кабинетка ябып, 8 сәгать тотып булмый. Безгә ирек булырга тиеш. Ә менә аз акчага эшләүче гади гражданнар өчен файдалы саныйм. Шулай да 16 мең сум акчага яшәү кыен. Сәгатьләп түләү тәҗрибәсе Европа илләрендә күптәннән кергән. Әмма анда бер сәгать өчен хаклар бездәгедән күпкә югары. Кайбер илләрдә ул 600-700 сумга кадәр җитә.
Равил Булатов, шагыйрь, нәфис сүз остасы:
– Сәгатьләп түләү кертелсә уңайлырак, билгеле. Хезмәткәр инде эш вакыты тәмамланмыйча эштән китмәячәк. Ләкин түләү тарифларын яңадан карап чыгарга кирәк бит әле. Җитештерү өлкәсендә исә сәгатькә карап кына түләп булмый. Бу ЛДПР депутатлары уйлаганча җиңел эш түгел. Әлеге партия вәкилләре өчен бәлки ул гади тоеладыр. Миңа калса, бу – чын күңелдән яхшылык теләүче популистик тәкъдим генә.
Айдар Тимербаев, автор-башкаручы, эшмәкәр:
– Бик каршылыклы мәсьәлә бу. Бер яктан, тормыш иптәшемнең (ул РКБ-2 дә эшли) сәгатенә ким дигәндә йөз сум алып эшләвенә бик риза булыр идем. Икенче яктан, Саба районындагы шәхси пекарня хуҗасы буларак, эшчеләремә дә хезмәт хакын шул ук күләмдә түләргә туры киләчәк. Шулай да мин барлык оешмалар да сәгатенә 100 сум түли ала дип уйламыйм. Бигрәк тә авыл җирлегендә. Анда болай да көч-хәл белән 5-6 мең сум хезмәт хакы түләнә. Анысын да берәр айга соңарып биреп баралар. Шуңа күрә бу яңалык тиз генә чынга ашмас дип уйлыйм.