Акбай янәдән Камал театры сәхнәсендә

19, 20, 26 һәм 27 октябрь көннәрендә Г.Камал исемендәге Татар дәүләт Академия театрында Туфан Миңнуллинның “Авыл эте Акбай” спектакленең премьерасы көтелә. Режиссеры – Лилия Әхмәтова, рәссамы – Булат Ибраһимов.

«Авыл эте Акбай» - һәркемгә таныш пьеса. Бу спектакльдә инде ничә буын балалар тәрбияләнде. Юлында күпме каршылыкларга очрап та, һәммәсен җиңеп чыга алган Акбай маҗаралары 80нче елларда бик популяр була. Балалар өчен куелган әлеге спектакльне легендарь дип атарга мөмкин. Режиссер Лилия Әхмәтова Туфан Миңнуллинның шушы пьесасына кабат әйләнеп кайта.

Лилия Әхмәтова, спектакльнең режиссеры: «Сәхнәгә кую теләге белән пьесаны янәдән укып чыккач шундый сорау туды: әлеге тема замана балаларын кызыксындыра алырмы икән? Шушы сорауга җавап эзләп, мин берничә мөһим әйберне аңладым. Акбай маҗаралары – ул мавыктыргыч сәяхәт! Аның юлында гел яңа персонажлар очрап кына тора, вакыйгалар бик тиз алышына... Шуңа да аны балалар яратып караган һәм киләчәктә дә ул алар өчен кызыклы булыр дип уйлыйм! Без спектакльдә “Шәһәрдә рәхәт, ә авылда күңелсез”, - дигән фикер уздырмыйбыз. Без бары тик балаларны кызыксындырып, аларның күңелен күрергә генә телибез”.

Пьесаның эчтәлеге буенча Тәмлетамак исемле песи (Ләйсән Фәйзуллина) авыл йортыннан шәһәгә кача. Анда аны авыл эте Акбай (Илнур Закиров) озата бара.

«Спектакльдәге вакыйгалар бик заманча килеп чыга! Гадәттә кешене кызыктыручы әйберләр хакында, балалар бит якты, матур булганны яраталар, - дип дәвам итә режиссер. - Тәмлетамак белән Акбай шәһәргә килгәч урамда яшәүче хайваннарга юлыгалар. Алар мода белән киенгән, “текә”ләр, тик туган йортлары, әти-әниләре юк...Соңгы чиктә Тәмлетамак барыбер авылга әйләнеп кайта. Иң мөһиме тыштан күренгән ялган ялтыравыклы матурлык түгел, ә туган йортың, андагы әти-әниең янында яшәү икәнен аңлый ул».

Камал театры барлык яшь тамашачыларын һәм шулай ук кабат балачакка кайтырга теләүчеләрне 19, 20, 26 һәм 27 октябрь көннәрендә “Авыл эте Акбай” спектакле премьерасына чакыра.