Алабугада культуралы айнытачаклар

Чат саен диярлек музейлар эшләп торган Татарстанның иң мәдәниятле Алабуга шәһәрендә айныткыч ачарга булганнар. Хәзерге вакытта республиканың бер шәһәре – Әлмәттә генә шундый бина бар. Менә алабугалылар да нефть башкаласы үрнәгенә иярергә булган. Җирле хакимияттә аңлатуларынча, шәһәрдә аракыны күбрәк эчә башламаганнар, бары гадәти хастаханәләрне исерекләрдән арындырырга вакыт җиткән.

Искәртеп узыйк, 2010 елда Россиядә эчке эшләр органнары балансындагы барлык айныткычлар да ябылган иде. Җитәкчеләр исерекләрне айныту белән табиблар шөгыльләнергә тиеш дигән карарга килде һәм артыгын “җибәргән” кешеләрне урамнардан хастаханәләргә илтә башладылар. Әлбәттә, хастаханә пациентлары һәм табиблар да үзләренә төн уртасында исерекләрне алып килүләренә шатланмый, аларны аңга китерергә кирәк ләбаса. Өстәвенә, хастаханәләрдә урыннар аекларга да җитми. Нәтиҗәдә, айныткычларны яңадан кире кайтара башладылар. Әлмәттә ул 2011 елда ук ачылды.

Ә Алабугада район башкарма комитеты җитәкчесе Рафил Әюпов әлеге проектның инициаторы булган. Ул бу мәсьәләне сессиядә күтәреп чыккан һәм депутатлар аны хуплаган. Әюпов сүзләренчә, берәүне дә үгетләргә туры килмәгән, чөнки барысы да айныткычның Россиянең теләсә кайсы шәһәре өчен бик кирәкле учреждение икәнлеген таный.

Республика шәһәргә әлеге максатларга 2,8 миллион сум акча бүлеп биргән. Җирле бюджетка да бу проектны тормышка ашыру өчен үз өлешен кертергә кирәк булачак. Айныткычны элеккеге туберкулез диспансеры бинасында ачарга җыеналар. Ул “Исерекләр өчен пункт” дип аталачак.

Башкарма комитет җитәкчесе сүзләренчә, Алабуга “пункты”ның совет чорындагы айныткычлар белән бернинди уртаклыгы да булмаячак. Хезмәт күрсәтүче табиблар исерекләргә карата игътибарлы булырга ышандыра. Айныткычны дәвалау учреждениесеннән шәхси сак фирмасы хезмәткәрләренең күплеге дә аерып торачак, алар кирәк булган очракта исерекләрне тынычландырырга ярдәм итәр дип көтелә.

Ни өчен яңа айныткычны ябылган искесе урынында ачмыйлар дигән сорауга, Әюпов:

- Иске бинаның тышкы күренеше безнең таләпләргә җавап бирми. Әлеге айныткычта дерматин белән тышланган ятаклар куелган ике камера һәм шәфкать туташы өчен кечкенә генә бүлмә бар иде. Ә яңасында ир-атлар һәм хатын-кызлар өчен аерым палаталар, процедуралар кабинеты, душ бүлмәсе булачак. Кыскасы, тиешле бөтен шартлар да тудырылачак.

Алабугада “пункт”ның әлегә төгәл бәясе билгеле түгел. Ә Әлмәт айныткычында салырга яратучылар бер төн кунып чыккан өчен 400 сум түли.