"МАТБУГАТ.РУ"ГА БОРЧУЛЫ ХАТ КИЛДЕ: ЖУРНАЛИСТЛАР ЯРДӘМЕ СОРАЛА

Кая барырга? Нишләргә? Кемгә мәрәҗәгать итәргә? Әни кеше журналистлардан киңәш сорый.

Хөрмәтле редакция!

Без сезгә гаиләбезгә килгән  аяныч хәл белән мөрәҗәгать  итәбез!

Минем улым мәктәпне бетереп, институтка кереп, аны бетерер алдыннан дин юлына басты. Бу юлда да кара көчләр бар икән... Ул озын сакаллар үстереп, чалбарларын кайтарып йөри башлагач, без аптырашта калдык. Сәер фикерләр ишетә башладык. Шул вакытта улыбызның ниндидер гипноз һәм зомбирование тәэсире астында булуын сизә башладык. Безне куркыткан сорауларга, ул үзенең чын мөселманча “Коръән” буенча яшәвен аңлата иде. Ана сүзе барып җитмәде, йөрәген эретмәде. Кеше белән аралашмый башлады, укуын да бетерә алмады. Ике мең сигезенче елның егерме беренче ноябрендә  ул өйдән чыгып китте һәм бүгенге көнгә кадәр аның кайда икәнлеге билгеле түгел. Ул тоткан дин безнекеннән аерыла. Шундый ук хәл безне балалары югалган тагын бер гаилә белән берләштерде.

Бу Казан шәһәрендә һәм Татарстанда бердәнбер очрак түгел. Җимерелгән язмышлар һәм гаиләләр мисалы җитәрлек. Димәк, бу күренеш иҗтимагый төс ала башлаган дип әйтергә нигез бар. Безнең яшьләребезне, балаларыбызны секта-оешмаларыннан һәм зомбированиеләрдән ничек коткарып калырга соң? Бу хәлне без мөрәҗәгать иткән оешмаларда беләләр. Әмма нигәдер ярдәм итә алмыйлармы яки теләмиләрме?

Бәлки, шундый ачы язмышка дучар булган ата-аналар яки якын туганнар бу хәлдән котылу юлын таба алганнардыр. Алар үзләренең тәҗрибәсе белән уртаклашсалар, без бик рәхмәтле булыр идек. Улымны табарга һәм дөрес юлга бастырырга нинди чаралар бар икән? Киңәшләрегез белән, зинһар, булышыгыз!!!

Бу күңелсез күренеш башка гаиләләрдә кабатланмасын иде. Безнең күпмилләтле республикабызда мондый секталарның булуы аяныч һәм куркыныч. Кешеләр мондый күренешләргә битараф калмасыннар иде һәм сак булсыннар иде.