"ТАТАРСТАН – ЯҢА ГАСЫР" ЯҢА ЕЛГА НИ ӘЗЕРЛӘГӘН? (ФОТО)

2009 елны "Татарстан – Яңа Гасыр" телеканалы белән бергә каршыласагыз, Яңа ел бәйрәмнәрегез искиткеч күңелле булып исегездә калыр!

Якыннарыгызны һәм сөйгәннәрегезне хәзер үк котлый аласыз. Яңа ел алдыннан "Хәерле иртә!" һәм "Доброе утро" тапшыруларында SMS-чат эшли башлады. Хәбәрләрегезне 5075 кыска номерына җибәрегез. SMS-хәбәр "ТНВ" сүзе белән башланып китәргә тиеш. 27 һәм 28 декабрь көннәрендә иртәнге 7дән "Sиннән Mиңа Sәлам" бәйрәм каналында алып баручылар Миләүшә Сибгатуллина һәм Илдар Кыямов 8171 номеры буенча Яңа ел котлаулары кабул итәчәк. 

27 декабрьдә "Татарстан – Яңа Гасыр"да - бер сәхнәгә төрле юнәлештә иҗат итүче татар музыкантларын туплаган уникаль концерт! Һип-һоп, рок, рэп һәм фьюжнның татарча яңгырашы гаҗәеп һәм бик кызык! "Яңа Гасыр"да – Яңа Хәрәкәт!" кичәсе нәкъ төн уртасында башлана.

Узып баручы елның иң соңгы көнен "Хәерле иртә!" һәм "Доброе утро!" тапшыруларының бәйрәм чыгарылышы ачып җибәрә. "Хәерле иртә!" алып баручылары үзләренең Яңа ел каникулларын Парижда үткәрергә җыена, ә очкыч аларны ниндидер сәбәпләр аркасында, ялгыш Мамадышка алып килә. Иртәнге тапшыру йолдызлары бу көтелмәгән хәлдә нишләр? 31 декабрьдә иртәнге сәгать 6да белерсез!

Сәгать 8дә "Доброе утро!" алып баручылары катнашында мюзикл башланып китә. Иртәнге йолдызлар арасында талантларның шактый булуы ачыкланды. Җырчы Алсу Әбелханова яңа яктан ачылды - ул Кар Патшабикәсен уйный. Тимур Билданов рэп җырларын үзе иҗат итеп үзе башкара. "Прогноз погоды" алып баручысы Лия Бризның тавышы да сокланырлык. Роман Абдуллин гитарада искиткеч уйный. 

Яңа ел төнендә "Татарстан – Яңа Гасыр" каналы тамашачыларын "Ретро-карнавал"га чакыра. Бәйрәмдә мушкетерлар татарча сөйләшә, ә Кыш Бабай "ут чыгарып" "Әпипә"гә бии!

"Татарстан - Яңа Гасыр" Казанның иң яхшы концерт залларының берсендә Эльдар Рязановның данлыклы "Карнавальная ночь" комедиясе буенча  Яңа ел бәйрәм төнен төшерде. Биредә урта гасыр пиратларын, серле башлык кигән тылсымчыны, Франциянең XVII гасыр туташ-ханымнарын, һәм хәтта 1970нче еллар диско биючесен дә очратырга була! Карнавалның төп геройлары – татар эстрадасының иң якты йолдызлары! Яңа ел төнендә Салават, Хәния Фәрхи, "Казан егетләре" төркеме, Зәйнәп Фәрхетдинова, Җәвит Шакиров һәм башка артистларны бөтенләй башка амплуада күрергә мөмкин булачак. Әлеге бәйрәм кичәсен төшерүдә шулай ук телевидение алып баручыларыннан тыш, карнавалга затлы костюм һәм кичке күлмәкләрдән килгән гади тамашачылар да катнашты.

"Һава торышы" кызлары һәм сихри тылсымчы

"Фәридә-Алсу" дуэты, Ләйсәнә Садретдинова ("Халкым минем...") һәм Данил Гыйниятов ("Татарстан. Атналык күзәтү")

Бөтен татар эстрадасы бер карнавалда!

Кар Патшабикәсе Алсу Әбелханова