«Рәвешләр» юмор театры елатты (ФОТО)

Якшәмбе кичендә Филармония концертлар залыннан, “Рәвешләр” юмор театры тамашасыннан елап чыгып баручы тамашачыларны күргәч, кайберәүләр гаҗәпкә калгандыр. Үзем дә шул залдан чыкканда, күз яшьләремне сөртеп: “Көләргә киткән апакай, елап кайта түгелме?” дип шаяртырга мәҗбүр булдым.

Тамаша бик күңелле булды үзе. Тулаем егетләрдән генә торучы яшь коллектив мәгънәле, тәрбияви юмор аша бүгенге чынбарлыктан ачы итеп көлә. “Салымнар түлибез бит, юллар булсын тәртиптә” дип җырлауларын алсаң да, ЮХИДИ инспекторының татар була торып, урысча гына сөйләшергә тырышуы да, гаиләдә хатын-кызларның баш булырга омтылуы да, картлар йортындагы хәлләр дә – барысы да тормыштан! Ришат Фазлыяхмәтов, Фирдүс Тямаевны халык аеруча яратып кабул итте. Мөнир Рахмаев җырлаганда сикереп торып бии башлаган кызлар турында әйтеп тору кирәк микән?! Мөнир, шуларны чамалапмы, сәхнәдән залга ук сикереп төште. Тирләп-пешеп урындыкка сикереп менеп җырлый башлады. Урындык сәхнәдән биегрәк булып күренгәндер инде бахырга!

Ә күз яшьләренең сәбәбе... Тамаша ахырында залда утыручы халыкка зур сюрприз булды: үзебез дә белмичә кемгәдер изгелек эшләгәнбез, хәйрия концертына килгәнбез икән бит. “Рәвешләр” юмор театры бу концерттан кергән акчаны балаларга тапшырды.

Балалар һәм аларның әниләре сәхнәгә менгәч, Әбри Хәбриевның: “Менә ул җир йөзендәге иң көчле кешеләр”, - диюеннән соңмы, әллә Линаның “Минем иң зур хыялым... аякларымның йөрүен телим” дигәчме, күпләр күз яшен сөртергә мәҗбүр булды.

Менә алар сәхнәдә басып тора. Алсу – Эльвира һәм Эльвина исемле ике игезәк кызның әнисе. Балаларның икесендә дә тумыштан ук эпилепсия. Гүзәл ханым – тол хатын. Аның Ислам исемле 9 яшьлек улында церебраль паралич. Ә Лина Миннемуллинада бөтенләй колак ишетмәгән, бик сирәк очраучы диагноз. Әниләрнең берсе күз яшьләре белән халыкка мөрәҗәгать итеп рәхмәт сүзләрен җиткергәндә дә битараф калып булмый иде.

Тамаша ахырында халык “Рәвешләр”не бик озак аягүрә басып алкышлады. Бу аларның Казан шәһәрендә беренче тапкыр зур залга чыгып мөстәкыйль тамаша уздыруы иде. Шушы чирканчыкны да алар изге эшкә юнәлдерде. “Рәвешләр” әле зур уңышларга ирешәчәк, менә күрерсез! Кешегә шатлык өләшүдән, изгелек кылудан башланган эш дәвамлы булырга тиеш.

Фото # 1

Фото # 2

Фото # 3

Фото # 4

Фото # 5