Миңнеханов – Путинга: “Акча беркайчан да артык түгел инде ул...”

Татарстанга Россия Президенты Владимир Путин килде. Эшлекле сәфәрнең төп максаты – ЮНЕСКОның тарихи мирасы исемлегенә тәкъдим ителгән Изге Болгар җире һәм Зөя утравы белән танышу.

Әлеге тарихи урыннар буенча ил башлыгын Татарстан Президенты Рөстәм Миңнеханов һәм Дәүләт киңәшчесе Минтимер Шәймиев озатып йөри.

Казан халыкара аэропортына очып килүгә Владимир Путин, вертолетка күчеп, Болгарга юл тотты. Биредә ул карап чыккан беренче объект – Истәлекле билге бинасы. Мәгълүм булганча, дөньядагы иң зур Коръән нәкъ менә шунда саклана. Минтимер Шәймиев Мәскәүдән килгән мәртәбәле кунакка изге китапның әлеге нөсхәсе турында кыскача мәгълүмат бирде, аны бирегә китерү тарихы белән таныштырды.

Путин Татарстан җирлегендә ислам дине кабул ителү тарихы турында да кызыксынып тыңлады. Россия җитәкчеләренең берсенең дә моңарчы Изге Болгар җиренә аяк басканы булмаган.

Соңыннан VIP-кунак Кече манарага юнәлде. Әлеге бина безнең көннәргә кадәр сакланып калган бердәнбер Урта гасыр архитектура һәйкәле. Ул “изге болгарлар” күмелгән урынга төзелгән дип фаразлана. Бина корылу XIV гасырның икенче яртысына туры килә. Әлеге изге урында җитәкчеләр Болгарда төзекләндерү эшләре башлану тарихын искә төшерделәр. Алар шулай ук күптән түгел генә табылган XIII-XIV гасыр казылмалары белән таныштылар.

Ил башлыгы мондый эшләрнең кирәк һәм бик мөһим булуын ассызыклады. Татарстанга бу эшне тормышка ашыру өчен 2 млрд сум акча бүлеп бирелүен билгеләп тә үтте ул. Рөстәм Миңнеханов, үз чиратында, “Акча беркайчан да артык түгел инде ул”, – дип рәхмәт сүзләрен җиткерде.

Рәсми сәфәр программасына кертелгән төп чара исә Ак мәчеттә узды. Владимир Путин дин әһелләренә карата Казанда кылынган террорчылык акты корбаны Вәлиулла Якуповны “Батырлык ордены” белән бүләкләде. Аны ул хәзрәтнең тол хатыны Галина Авентьевага тапшырды. Ә республика мөфтие Илдус хәзрәт Фәезгә Россия башлыгы Дуслык ордены бирде.

“Болгар – Татарстан өчен генә түгел, ә Россия өчен дә мөһим изге урын, – диде Владимир Путин Ак мәчеттә җыелган дин әһелләре, дәүләт һәм җәмәгать эшлеклеләре алдында чыгыш ясаганда. – Нәкъ менә шушы җирлектә күп гасырлар элек ислам дине кабул ителгән. Бу исә Идел буе халыкларын формалаштыруда зур роль уйнаган”.

Билгеле ки, ул июль аендагы тетрәндергеч вакыйгаларга да тукталды: “Дин әһелләренең төп эше – халыкка хезмәт итү. Бактың исә, әлеге эшчәнлек куркыныч та икән әле. Вәлиулла хәзрәт чын мәгънәсендә үз эшенә бирелгән тырыш кеше булган. Җинаятьчеләр почмактан гына качып эш итә. Димәк, алар куркалар. Без илдә тынычлык булсын өчен барысын да эшлиячәкбез”, – дип белдерде Илбашы.

Болгардан Владимир Путин Зөя утрау-шәһәрчегенә юл тотты.