MUBAI КОНЦЕРТЫ НИЧЕК УЗГАН? (ФОТО)

25 октябрь кичендә “Желтая кофта. Маяковский” клубында Мубайнын беренче концерты узды. Тамашачы күптөрле һәм төрле яшьтәге, тамашаны бик җылы кабул итте, ни дисәң дә “тере” музыка кораллары, “тере” тавыш – ис киткеч! Концертны карарга бик күп журналистлар, телейолдызлар, Камал театры артистлары килгән. Кайда карама таныш йөзләр.

Мубайның хезмәт сала торган урыны Камал театрыннан Шамил Зиннурович Закировның килүе чарага мәртәбә өстәде. Концерт уртасында Шамил Зиннурович сәхнәгә менеп, Мубайны котлый башлагач, “Димәк, директор кайтып китә”, дип уйладым. Әмма, ул котлап, җылы сүзләр әйтте, “чәчәк алып килмәкче идем дә, конверт яхшырак булыр, дигәч, конверт алып килдем”, – дип аны буләк итте. Сәхнәдән төшкәч тә чыгып китмәде үзе, яңадан урынына утырып, тамашаны ахырына кадәр карады.

Концерт бер сәгать тә егерме минутка исәпләнгән. Ялыктырырга өлгерми, бераз җитмирәк тә кала. Тамашаны тәмамладык, дигәндә дә халык Мубайны сәхнәдән җибәрми торды, ул кабатлап берничә җыр башкарды.

Оештыручылар сүзләренчә, алар хәтта бераз керем дә алганнар. Чыгымнарны каплый алмабыз, дип курыккан идек, диләр.

 Беренче коймак – төерле була, диләр, Мубайның тәүге концерты бик уңышлы үтте. Тамашыны бик яратып, әсәрләнеп кайттым. Мубайны Европага күрсәтсәң дә оят түгел. Үзебездә дә яхшы музыка уйнаган, матур җырлаган артистлар бар икән лә.

Автор фотолары.