ЯЗУЧЫЛАР БЕЛДЕРҮ БЕЛӘН ЧЫКТЫ

Тукаебыз яшәгән "Болгар" кунакханәсенең җир белән тигезләнүе берәүне дә битараф калдыра алмады. Редакциягә тирән борчылу хисләре белән сугарылган язмалар, рәсми мөрәҗәгатьләр әле дә килеп тора. Бу уңайдан Язучылар берлеге идарәсе дә битараф кала алмады, белдерү белән чыкты.

"Быелгы елның изге Рамазан ае төгәлләнгән көннәрдә рухи тормышы бөек, җисми тормышы фаҗигале булган, халкыбызның даһи улы Габдулла Тукайның шәхси язмыш дәфтәренә тагын бер кара сәхифә язылды: аның Казандагы төп торагы булган бина,  кырыгынчы бүлмәсендә шагыйребез яшәгән "Болгар" кунакханәсе  юкка чыгарылды. Халкыбызның киң җәмәгатьчелеге, бигрәк тә язучыларыбыз соңгы берничә дистә ел буе әле­дәнәле бу бина төзекләндерелеп, аның кадерле Тукаебыз яшәгән бүлмәсендә шагыйрьнең мемориаль музее оештырылырга тиеш дигән тәкъдим ясап килделәр. Әмма бу тәкъдимнәр тормышка ашырылмый калды", – диелә анда. Белдерүдә шулай ук язучыларның моннан бер ай ярым элек кенә Тукайга 125 ел тулу уңаеннан төзеләчәк Татарстан Хөкүмәте планына теркәү өчен 32 тәкъдим кабул итүләре дә искәртелгән. Анда "2010 елга Г.Тукай яшәгән "Болгар" кунакханәсен төзекләндерергә һәм анда музей оештырырга" дигән юллар да бар.

Әмма "Болгар" кунакханәсе Казан йөзеннән сөртеп ташланды. Инде нишләргә? Белдерүдә Язучылар берлеге идарәсе үзләренә мө­рәҗәгать иткән замандашларының, рәсми оешмаларның "бу гамәлне кылган кешеләрнең исемнәрен җәмәгатьчелеккә белдерүне, бу эшне рәсми рәвештә гаепләп чыгуны таләп итү"ләре белән килешүен белдергән. Болай эшләү киләчәктә халкыбызның изге мәдәният ядкәрләрен күз карасыдай саклау өчен зур бер сабак булыр, диелә анда. Язучылар "Болгар" кунакханәсеннән бушаган изге урын киләчәктә ничек файдаланылыр икән дигән тирән борчуда. Аның тышкы кыяфәтен, бигрәк тә Тукай яшәгән кырыгынчы бүлмәне тулысынча кабатлаган яңа бина төзелү бүгенге фаҗигане өлешчә генә булса да җиңеләйтер иде, диелә белдерүдә. Бу урын "Татнефть" милкендә, ә мәдәнияткә һәрчак хәерхаһ булган әлеге берләшмә югарыда әйтелгән тәкъдимнең тормышка ашырылуына ышаныч белдерә.