Балык Бистәсендә вәхшиләрчә үтерелгән Гүзәлия Мөхәммәтгалиеваны җирләделәр

Шушы көннәрдә Балык Бистәсе районын кара кайгы басты. Монда вәхшиләрчә үтерелгән авырлы Гүзәлия Мөхәммәтгалиева җирләнде. Яшь ханымның үле гәүдәсен узган шимбәдә Корноухово авылы янындагы елга буеннан табып алалар. Ул чишендерелгән, берничә урыннан үткен корал белән кадалган. Гүзәлия Мөхәммәтгалиева 19 апрель көнне эштән кайтышлый югалган була.

Ханым Балык Бистәсе районы, Күгәрчен авылында туып-үсә. Казанда белем алып, район үзәгендәге китапханәдә рәссам-бизәүче булып эшли. Олы Елга авылына кияүгә чыккач та, яраткан эшен ташламый, 20 чакрым ераклыкта урнашкан район үзәгенә йөреп эшли.

Фаҗига булган көнне дә Гүзәлия гадәтенчә эшен тәмамлау белән, юлга чыгып, машина туктата. Машинага утыргач, ире Ринатка шалтыратып, Анатыш авылы янында машина булуын, 15 минуттан кайтып җитүен әйтеп, каршы алуларын сорый.

Ринат исә 3 яшьлек кызын Дилбәрне балалар бакчасыннан алып кайтып, бергәләп Гүзәлияне каршы алырга чыга. Әмма Гүзәлия күренми. Шуннан соң ир кире өенә кайта һәм машинасына утырып район үзәгенә юл ала. Ләкин барыбер хатынын таба алмый. Шулай берничә тапкыр район үзәгеннән авылга, авылдан районга барып тормыш иптәшен эзли. Арлы-бирле йөреп таба алмагач, ниндидер хәл булганына төшенеп, Ринат Гүзәлиянең югалуы туганнарына хәбәр итә.

Шушы көннән авырлы ханымны хокук саклау органнары, кайбер оешмаларда эшләүче хезмәткәрләр, авыл халкы, гадәттән тыш хәл бүлеге хезмәткәрләре бергәләп эзли башлый.

Яшь ханымның үле гәүдә табылганчы ук, РФ Җинаять процессуаль кодексының 105 маддәсе буенча (кеше үтерү) җинаять эше кузгатыла. Чөнки Гүзәлиянең тәртипле гаиләдән булуы, кечкенә баласы барлыгы һәм башка шәхси мәгълүматлар билгеле булганнан соң, аңа бәйле рәвештә җинаять эше кылынуы аңлашыла.

Җинаять кылган кешенең шәхесен ачыклау максатыннан әлегә тикшерү бара.